Prezidente Bankada FRETILIN, Aniceto Guterres hatete, PN la presiza tau osan rihun $500 husi fundu Covid-19, tanba osan duadesimál ba fiskalizasaun iha hela.
"Bankada FRETILIN dala ida tan reintera katak, Parlamentu Nasionál la presiza uza osan $500.000 ne'ebé Parlamentu Nasionál ida ne'e aprova tiha ona," dehan Aniceto iha plenária, Segunda (27/04).
Tuir deputadu ne'e, razaun ba osan rihun $500 ba fiskalizasaun la nesesariu.
"Se razaun mak tau halo fiskalizasaun, ne'e laiha dúvida, osan ne'e la presiza, tanba osan duadesimál iha hela," dehan Aniceto.
Molok ne'e, Prezidente PN Arão Noé de Jesus da Costa Amaral hatete, iha momentu saida de'it mak bankada sira hakarak altera osan rihun $500, bele aprezenta proposta.
"Agora hakarak altera fali bele halo projetu de lei, ne’e regra normál. Agora nakloke, deputadu sira bele hatama projetu lei, aprezenta depois ba debate iha plenéria. Se plenária aprova, ita bele hasai tiha osan ne’e," dehan Arão.
Tuir nia, prosesu aprovasaun osan ne'e tuir lei, tan ne'e bainhira atu altera tenke mós tuir lei.