Bankada CNRT, PD, UDT/FM, no PUDD, hatudu sinal katak sira sei la a favor ba estensaun EE ho razaun prinsipal tanba povu hahú hamlaha.
Bankada seluk, hanesan FRETILIN no PLP, klaru katak sei fó apoiu ba pedidu estensaun EE ne'ebé Prezidente Repúblika hato'o ba PN bazeia ba proposta husi governu.
Enkuantu, KHUNTO ne'ebé hola parte iha bloku AMP foun deklara ho nakloke katak sei fó apoiu ba estensaun EE. Signifika, KHUNTO bele sai xave importante ba estensaun EE.
Deputadu Bankada KHUNTO no atual Vise Prezidente PN, Luis Roberto deklara, bankada KHUNTO konkorda estende EE tanba realidade hatudu katak númeru pozitivu Covid-19 aumenta ba beibeik.
Maske konkorda, deputadu ne'e husu ba governu atu oferese subsidiu ba povu tomak.
"Husu ba governu ida agora, ami fó apoiu (estende EE). Halo nusa para bele ezekuta i foti medidas lalais ba ita-nia populasaun sira ne'ebé vuneral iha karaik ne'e, ita sira koalia ne'e fulan simu (osan) be responde ba nesidade mais povu iha karaik ne'e enfrenta hamlaha hela," dehan nia iha PN, Segunda (27/04).
Iha fatin hanesan, Deputada KHUNTO Olinda Guterres hatete, apoiu tebes ba informasaun husi deputadu CNRT nian kona-ba povu halerik tanba faan modo la folin, hahan laiha.
Maibé, tuir Olinda, ida ne'e mosu tanba CNRT xumba Orsamentu Jeral Estadu (OJE) 2020.
Tuir nia, se CNRT la xumba OJE 2020, ohin loron povu sei la halerik hamlaha.
"Ha'u ohin dadersan rona tan televizaun katak povu hamlaha, ami faan modo la folin. See mak halo halo ita-boot sira faan modo la folin? Xumba orsamentu iha Parlamentu Nasional ami mak halo maibé laos ha'u, ita-boot sira husu (deputadu CNRT) sira ne'e, labele koalia ba ha'u iha dalan osan ne'e bainhira mak iha, imi husu ba maluk sira ne'ebé vota mean ho abstensaun, ha'u lae, tanba osan ita vota kontra tiha koalia fali dehan povu hamlaha," dehan Olinda.
Kona-ba subsidiu, deputada ne'e hatete, foin lalais PN aprova ona osan millaun $150 hodi bele atende mós situasaun ne'e, maibé governu presiza halo preparasaun.
"Diak liu estende par ita sulan bebeik i husik ema sira ka moras ne'e daet ba fatin seluk ka anin huu tiha ba tasi, ami na'in lima orsida vota a favor ba pedidu Prezidente Repúblika nian, ami apoiu, vota a favor, seim rezerva señor Primeiru Ministru," dehan Olinda.