"Estadu Emerjénsia la'ós solusaun, maibé kondisaun ida para ajuda ita hodi prepara kondisaun, prepara ita nia-aan, kapasita ita hodi responde situasaun ne'e, liu-liu ita-nia sidadaun sira," dehan Xefe Governu, iha Plenária Parlamentu Nasionál (PN), iha diskusaun debate estensaun ba EE, Segunda (27/4).

Nia konsidera rasosinu deputadu sira nian ne'ebé hili ekonomia ne'e la loos.

"Ita nia tendensia ita komesa hatete, tanba impaktu moras ne'e iha, vida ekonomia la di'ak, entaun di'ak liu valoriza ne'e, ha'u hanoin rasosinu ida ne'e la loos, entre vida ho ekonomia, hau hili vida depois mak ekonomia," dehan PM.

PM Taur mós hatene situasaun hamlaha iha TL, Maibé labele uza hamlaha hanesan bandeira ida hodi jeneraliza buat hotu.

"Ha'u hatene kee situasaun ko'alia kona hamlaha, istória Timor ha'u koñese iha tinan 1976-1978 ne'ebé ema mate hamlaha, konsekuénsia funu nian, ohin ita rekoñese iha familia balun rekoñese ita-nia ajuda, presiza iha kondisaun no kapasidade atu identifika para apoiu ba sira, mas uza ida ne'e hanesan bandeira para jeneraliza ne'e la loos," dehan TMR.

Eis Jeneral Fitun Rua ne'e mós alerta katak, rasosinu ne'ebé uza buat ida hodi jeneraliza buat hotu ne'e la'ós buat diak hodi eduka sidadaun sira.

"Justifikasaun ida ne'ebé ita la eduka ita-nia sidadaun sira, justifikasaun ida ne'ebé ita la kompriende, tanba ne'e mak governu konsiente ho impaktu sira hotu," nia dehan.

Xefe governu mós subliña katak, governu preparadu ho apoiu PN.

"Governu mesak labele buat ida, se laiha apoiu husi Parlamentu Nasional, ami prontu servisu hamutuk ho PN atu halo buat hotu-hotu, tanba la'ós difikulta ka minimiza risku, espansaun Coronavirus iha ita-nia rai, mas liu-liu minimiza ninia impaktu ekonomia sosiál iha vida ita-nia sidadaun sira nian," tenik PM Taur.

Ho situasaun ne'e, PM Taur reforsa pedidu Prezidente Repúblika (PR) nian atu PN autoriza para bele dekreta estensaun Estadu Emerjénsia nian ba fulan ida tan. (*)