Ho pedidu foun ne'e signifika governu sei iha osan hamutuk millaun $350 hodi atende problema ne'ebé Timor-Leste sei hasoru. Molok ne'e PN autoriza ona governu hodi foti osan hamutuk millaun $250 husi Fundu Petroliferu.
Ministra Finansas interina Sara Lobo Brites hatete, iha preparasaun antisipada ba Covid-19, governu husu tan millaun $100 ba Parlamentu Nasionál.
"Horseik husu tan $100 milloes, nune'e horseik komisaun C parlamentar husu Ministeriu Finansas atu aprezenta ninia detallu ba $100 milloes ne'e atu uza ba saida, depois mak komisaun C parlamentar sei aprezenta ba parlamentu nasional liu husi relatoriu pareser," dehan Ministra interina ne'e hafoin reuniaun Konsellu Ministru iha Sentru Konvensaun Dili, Sabadu (28/03).
Ohin, ministra ne'e dehan, KM aprova ona detallu husi osan millaun $100 no sei haruka ba PN.
Ministra ne'e esplika, osan millaun $100 ne'e hamutuk ho pakote levantamentu fundu petrolifeiru millaun $250, maibé millaun $100 ne'e ninia destinasaun atu aumenta ba iha rezerva kontizensia ka karik iha inisiativa seluk depende ba PN.
"Maibé ninia espesifiku ne'e ba de'it Covid-19 no dezastre naturais".