Tuir informasaun, Timor-oan ne'ebé hala'o serbisu iha Australia hamutuk na'in 1.074. Husi númeru ne'e, na'in 59 mak fila mai ona.
"Timor-oan hamutuk 59, ha'u fahe hotu ona ba fatin (kuarentena) rua tuir desizaun Ministériu Saúde nian, entaun na'in 20 iha City Hotel, tanba ema simu limitadu no na'in 39 ne'e dezloka ba iha kuarantena (Otel Novo Horizonte) Metiaut nian," informa autoridade ne'ebé simu Timor-oan sira ne'e iha Aeroportu Internasionál Nicolau Lobato Dili, Sábadu (28/03/2020).
Autoriedade ne'e dehan, trabaladór Timor-oan na'in 1.015 sei fila hotu mai Timor-Leste, tanba Australia daudauk ne'e implementa lockdonw no vida moris iha ne'ebá karun.
"Ami simu ona informasaun husi adidu iha Australia katak Timor-oan ne'ebé sei iha Australia ne'e hamutuk 1.015. Tanba estadu (Australia) lockdown durante fulan tolu ne'e sira la serbisu, kustu vida karun entaun obrigatóriamente fila mai Timor-Leste," nia dehan.
Tuir fonte ne'e, iha Domingu (29/03), Timor-oan lubuk ida husi Singapura no Indonezia sei mai tan Timor Leste.
"Aban (Domingu 29/03) aviaun tolu mak sei to'o tan, aviaun rua husi Indonézia hanesan Sriwijaya no Citilink no aviaun Airlines husi Singapura," nia dehan.
Tuir nia, bainhira Timor-oan sira ne'e fila hotu mai, governu sei hetan difikuldade atu akumula sira tanba kuarentena ne'ebé governu prepara la sufisiente.