PM Taur: Loloos Diretora Saude Munisipiu Manufahi Ko’alia Uluk Ho Nia Superior

Diretora Servisu Saúde munisípiu Manufahi, Florência Tilman Corte-Real Diretora Servisu Saúde munisípiu Manufahi, Florência Tilman Corte-Real Foto Especial

Tempotimor (Dili)-Informasaun kona-ba Suspeitu Covid-19 iha Same ne'ebé Primeiru Ministru anunsia iha Parlamentu Nasional hamosu polemika. Tuir PM Taur loloos Diretora Serbisu Saude Munisipiu nonook no hato'o protesta liu husi ninia superior.

PM Taur dehan, nia simu informasaun kona-ba suspeitu Covid-19 iha Same, Munisipiu Manufahi, husi Vise Ministra Saude Elia.

Ha’u hanoin konfuzaun ne’e iha (primeiru prontu imi jornalista mai sukit Sra. Diretora be ko’alia arbiru de’it) loloos ne’e informasaun ne’e sai husi Sra. Ministra i informasaun ne’ebé ha’u simu ne’e, simu husi Señora Ministra (Elia)," dehan PM Taur Matan Ruak iha Palásiu Prezidensiál bairro-pite, Sesta (27/03/2020).

Tuir PM Taur konfuzaun ne'e mosu tanba lia-fuan suspeitu.

"Problema ne’e kuandu ita temi lia-fuan dehan suspeitu, saida mak suspeitu? Suspeitu ne’e lia-fuan ida Português hatete katak ita deskonfia katak bele moras ka lae, entaun nia tama kuarentena, kuandu test tiha dehan laiha mak foin haruka ba uma".

"Ne’ebé suspeitu ne’e lia-fuan português dehan deskonfia. Agora Señora (Diretora Serbisu Saude Munisipiu Manufahi) ne’e dehan suspeitu laiha, nia laiha be entaun o tau tiha iha kuarentena depois dehan la suspeitu fali ka, ne’ebé nia la hatene Portugés ne’ebé nia ko’alia arbiru," dehan Xefe Governu ne'e.

Tuir PM Taur, suspeitu ne’e dehan deskonfia katak nia bele iha moras no mós bele la moras.

"Señora ne’e dehan hanesan ne’e nia la suspeitu, mais tau tiha kuarentena ona entaun se o tau kuarentena ne’e suspeitu. Ne’ebé problema Portugés tanba ne’e mak ha’u horisehik ne’e dehan laiha buat ida, ha’u mak sala, tanba Sra. la persebe Portugés, la hatene lia-fuan suspeitu ne’e nia arti ne’e mak halo nusa," xefe governu ne'e dehan.

Maske nune'e,  PM Taur lamenta mós ho asaun Diretora Serbisu Saude Munisipiu Manufahi ne'ebé rezeita direitamente informasaun ne'ebé PM Taur hato'o iha PN.

"Agora em termus metodolojia loloos ne’e nia (Diretora) nonook, informa ninia superior depois ninia superior ko’alia, la’ós nia iha ne’ebá, nia dezmente kedas buat ne’ebé Primeiru-Ministru ko’alia iha orgaun soberania ida ninia fatin. Ne’e loloos ne’e medida indisplinar ba Señora ne’e, não é!," katak Taur.

Rate this item
(0 votes)
Last modified on Saturday, 28 March 2020 19:21
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.