"Husu Parlamentu atu halo alterasaun ne'e hodi fo kbiit ba governu bele hetan osan hodi selu kompromisu iha rai-laran no li'ur," dehan Taur, iha Palásiu Prezidensial, Bairru-Pité, Kinta (12/3).
Antes ne'e, liuhusi reuniaun Konselu Ministru (KM) aprova ona proposta triseira alterasaun ba Lei Orsamentu no Jestaun númeru 13/2009 kona-ba rejime duadesimu.
"Alterasaun ne'e atu bele iha fleksibilidade uitoan no mós atu fó biban ba governu para bele atende ba iha situasaun balun, liuliu kontratu sira ne'ebe ho montante liuhusi montante fulan ida nian", dehan Ministra Finansas interina, Sara Lobo Brites, iha Palásiu Governu, Kuarta (11/3).
Nia afirma, iha alterasaun ne'e mós atu atende ba iha situasaun ne'ebé Ministériu Negósiu Estranjeiru no Kooperasaun (MNEK) hasoru liuliu atu halo arrenda ba embaixada sira ne'ebe tuir kontratu balu selu fulan neen no tinan ida.
Nune'e, ho rejime duadesimu lei la fo dalan atu selu fulan neen dala ida, iha alterasaun preve ida ne'e no situasaun balu atu sosa ai-moruk reajente ba saude nian no pagamentu ba benefisiu sosial sira. Tanba ne'e, iha alterasaun ne'e atu loke dalan ba governu atu atende. (*)
