"Karik situasaun ida ne'ebé obriga taka ita-nia aan, izola ita-nia aan, ita halo. Mas, agora seidauk," dehan PM Taur, iha Palásiu Prezidensiál, Bairru-Pité, Kinta (12/3).
Taur rasik hato'o ona ba Prezidente Repúblika, Francisco Guterres Lú Olo, relasiona ho ameasa Covid-19 kona-ba preparasaun Timor-Leste nian, nune'e bainhira nesesariu para taka aan ba mundu maka Timor-Leste sei halo.
Xefe Governu deklara, daudaun ne'e seidauk atu taka aan ba mundu, maibé hili sidadaun estranjeiru sira ne'ebé mai husi país sira ne'ebé nia númeru boot liu husi Konsellu Ministru ne'ebé deside ona atu estende tan ba semana haat.
Antes ne'e, Governu liuhusi Konsellu Ministru (KM) aprova projetu rezolusaun hodi estende aplikasaun no ezekusaun temporariu hodi halo interdisaun no restrisaun ba sidadaun estranjeiru sira ne'ebe atu tama mai Timor-Leste.
Iha rezolusaun ne'e atu haree ba sidadaun estranjeiru ne'ebé iha semana haat ikus ne'e sai ka halo tránzitu liuhusi Repúblika Populár Xina, Repúblika Koreia, Repúblika Italiana no Repúblika Izlámika Iraun.
Entertantu, daudaun ne'e Timor-Leste rasik sei livre husi ameasa Covid-19, hafoin rezultadu teste amostra sidadaun Italianu ne'ebé haruka ba Darwin Australia negativu.(*)