Login to your account

Username *
Password *
Remember Me

CNRT Preokupa Aniceto ho Vise PPN-Rua ‘Nadodon’ ba Estranjeiru

Xefe Bankada CNRT, Duarte Nunes. Xefe Bankada CNRT, Duarte Nunes. Foto Suplay

Tempotimor (Dili)-Bankada Congresso Nacionál de Reconstrução de Timor (CNRT) preokupa Prezidente Parlamentu Nasionál (PPN), Aniceto Longuinhos Guterres Lopes hamutuk ho vise PPN, Maria Angelina Sarmento no Luis Roberto ne'ebé nadodon hotu ba vizita estranjeiru no husik meza Parlamentu Nasionál mamuk.

“Ida-ne'e nunka bele akontese, Prezidente PN ba tiha Indonézia, vise nain-rua ba hotu Roma, atu lidera meza ne'e, so Prezidente mak lidera, ka vise, ne'ebé ida-ne'e nunka akontese. Purtantu loloos ne'e devia Komisaun Permanente deside atu ba vizita ida-ne'e, vise ida mak ba, no ida hela, tenke hanesan ne'e ga, Agora Vise na’in-rua kesan mak ba hotu Italia, ne'e saida mak ne'e”, dehan Xefe Bankada CNRT, Duarte Nunes iha PN, kuarta (24/08).

Vise Xefe Bankada CNRT, Patrocínio Fernandes mós hatete, Parlamentu Nasionál ne'e nu'udar orgaun ba desizaun polítika, tuir loloos situasaun hanesan ne'e labele akontese.

“Ita lahatene ita-nia situasaun ne'e, se aban ka bainrua iha situasaun ruma ke presiza desizaun polítika karik saida mak akontese”, afirma nia.

Tanba lideransa na’in-tolu ne'ebé iha kompeténsia konvoka reuaniun iha Meza Parlamentu Nasionál, ne'e mak Prezidente no mínimu mak vise Prezidente ne'ebé hetan delegasaun husi Prezidente, tanba ida-ne'e tuir funsionamentu normal iha rejimentu.

Maibé agora deputadu sira lahatene tanba sa mak kompozisaun meza PN nian sai tiha hotu ne'e, no sira-nia interpretasaun ba regra sira-ne'e halo nusa, lahatene.

“Tanba desizaun polítika ba nasaun ida-ne'e iha Parlamentu Nasionál, se nasaun no Estadu ne'e presiza desizaun polítika ruma iha tempu sira ne'ebe meza parlamentu mamuk ne'e karik, atu halo nusa, ida-ne'e mak ami preokupa”, hatete nia.

Vise Prezidente Parlamentu Nasionál, Maria Angelina Sarmento hatete, kona-ba kestaun kompozisaun meza Parlamentu Nasionál aujensia ne'e hodi hala'o vizita ba estranjeiru ne'e laiha implikasaun tanba dadaun Komisaun Permanente iha Parlamentu funsiona hela.

“Ne'ebé ha'u hanoin  tanba agora iha periodu resesu, atividade mós labarak no Komisaun Permanente nia plenária sei realiza filafali iha 31 agostu, entaun ha'u hanoin ladun iha implikasaun sira, ba aujensia Parlamentu Nasionál nian,"dehan nia iha PN, segunda (22/08).

Dadauk Komisaun Permanente rasik nia atividade plenária ikus realiza ona iha 16 agostu no kada semana rua mak foin hala'o dala ida, husi deputadu hamutuk 29 to'o 31.

“Agora kompeténsia meza nian, agora sai husi ne'e 22 agostu, to'o semana purvolta loron 9 ho 10 mak ami fila, mais Prezidente Parlamentu sei filafali mai PN hodi hala'o nia kna'ar semana oin”, esplika nia.

Prezidente PN hala'o vizita ba Indonézia tanba atu atende ajenda kona-ba reuniaun bilaterál ho Parlamentu Indonézia nian iha semana ida-ne'e nia laran no vize PPN nain-rua mak sei vizita ba Roma atu partisipa mós konsistóriu Kardeál Dom Virgílio nian.

“Aumesmu tempu sei iha mós audénsia ho santu padre ho akta entidade Timor-Leste nian. Tanba ida-ne'e hanesan oportunidade ida ne'ebé grau, atu hetan Amu pPapa santu padre ne'e la'os kualker bele ba hasoru tanba ne'e mak ba ami ne’e hanesan previléjiu ida atu ba hasoru amu papa iha oportunidade ida-ne'e”, haktuir nia. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« December 2022 »
Mon Tue Wed Thu Fri Sat Sun
      1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31  

Tempo Timor Networks

Online Counter