“Konserteza halo festa iha nakukun laran ne'e ladún di'ak ne'e, ne'ebé ita-nia empreza estatál ne'e sei garante másimu”, hatete Taur hafoin enkontru semanal ho Prezidente Repúblika (PR), Francisco Guterres ‘Lú Olo’, iha Palásiu Prezidénsia, kinta (05/05).
Tanba hala'o festaza ruma konserteza eletrisidade ne'e tenke lakan hodi fó naroman maibé la'ós festa fali iha nakukun laran.
Ho ida ne'e, EDTL hanesan empreza estatál ida, sei fó garantia másimu nune'e ninia iluminasaun ne'e la'ós de'it iha fatin serimónia maibé mós iha sidade laran bele kontinua lakan nafatin.
Nune’e mós prosesu preparasaun seguransa husi Ministériu Interiór (MI) dadaun ne'e atinje ona pursentu 70, ho nune'e espera katak iha loron 17 ka 18, prosesu bele prontu ona atu prepara-an ba festa, inklui simu bainaka ka konvidadu sira maihusi estranjeiru.
Ba konvidadu sira ne'ebé Primeiru Ministru rasik konvida, ida ne'e maihusi nasaun sira iha Comunidade de País das Lingua Portuguesa (CPLP), inklui ASEAN nian, nomós konvida bainaka balun husi nasaun seluk.
“Maibe ita lahatene sira iha tempu para sira bele partisipa, mais kuandu sira konfirma naturalemente ami sei fahe informasaun ba ita-boot sira, de momentu ne'e ita seidauk simu konfirmasaun”, hatete nia.
Ba populasaun ne’ebé dada bandeira iha loron 20 maiu ida ne'e, parte Governu haree hanesan loron orgullu ida ba sira no nasaun, tanba ne'e Governu agradese sidadaun hothotu dada bandeira iha uma. (*)