Tuir informasaun ne’ebé www.tempotimor.com, asesu iha pájina Ministériu Finansas, kinta (11/05), entre tinan 2020 no to’o iha fulan-abríl 2023, mak iha tinan 2020, Parlamentu Nasionál aprova levantamentu osan husi Fundu Minarai ho montante millaun $964 no Governu halo de’it levantamentu millaun $886 ka 92%.

Nune’e iha tinan 2021, Parlamentu Nasionál aprova levantamentu osan husi Fundu Minarai ho montante billaun $1,378 no Governu foti de’it billaun $1,148 ka 83%. Iha tinan 2022, Parlamentu Nasionál aprova levantamentu osan husi Fundu Minarai ho montante billaun $1,553 no Governu foti de’it billaun $1,404 ka 90%. Ba tinan 2023 ne’e, Parlamentu Nasionál aprova levantamentu osan husi Fundu Minarai ho montante billaun $1,346 no to’o iha fulan-abríl 2023, Governu foin mak foti de’it millaun $300 ka 22%.

Nune’e, husi tinan 2020 to’o abríl 2023, Governu Konstitusionál daualu liuhusi Ministériu Finansas, halo ona levantamentu osan husi Fundu Minarai ho montante totál billaun $3,7 husi montante billaun $5,2 ne’ebé mak Parlamentu Nasionál aprova ona-iha poupansa kuaze billaun $1,5 entre levantamentu aprovadu husi Parlamentu Nasional (billauan $5,2) no levantamentu atuál (billaun $3,7).

Poupansa ida-ne’e akontese tambá Ministériu Finansas aplika jestaun fluxu kaixa (cash flow) ne’ebé bainhira iha nesesidade atu halo reforsu ba kaixa Estadu mak Governu foin hato’o pedidu levantamentu osan ba Banku Sentrál Timor-Leste. Se laiha nesesidade, Governu sei la-halo levantamentu.

Tuir relatóriu ikus husi Banku Sentrál Timor-Leste, to'o iha 31 Dezembru 2022, balansu Fundu Minarai hamutuk billaun $17,4. (*)