Tuir informasaun ne’ebé www.tempotimor.com asesu iha pájina Ministériu Finansas, kuarta (12/04) katak, kalendáriu, Governadór Rui Gomes ho delegasaun Timor-Leste sei hala’o Reuniaun Bilaterál ho Xefe Foun Misaun Artigu IV, FMI ho nia ekipa.

Iha reuniaun bilaterál ne’e parte rua sei diskute konaba data fixu vizita Misaun Artigu IV, FMI ba Timor-Leste ne’ebé mak sei realiza iha Segundu Semestre 2023 hafoin Timor-Leste realiza Eleisaun Parlamentár.

Governadór Rui Gomes ho delegasaun mós sei hala’o reuniaun bilaterál ho Vise-Prezidente IFC hodi ko’alia kona-ba asisténsia tékniku ne’ebé mak durante ne’e IFC fó mai Governu Timor-Leste partikularmente ba projetu sira estratéjiku ne’ebé ho modalidade Parseria Públiku-Privada (PPP, sigla Inglés).

Ba projetu estratejiku sira hanesan Projetu PPP Portu Tibar, Projetu Redezenvolvimentu no Komersializasaun Portu Díli, Projetu Diagnóstiku Saúde inklui Projetu PPP “Uma Kualidade ho Presu Asesível” ne’ebé Governu konsidera nu’udar direitus umanu báziku no fundamentál ba Timoroan nia saúde no moris di’ak.

Iha ámbitu Reuniaun Primavera 2023, Delegasaun Timor-Leste mós sei hala’o reuniaun bilaterál ho Diretór Ezekutivu Banku Mundiál Grupu Konstituente EDS21 ne’ebé mak Timor-Leste no Portugál hola parte ba.

Aleinde ne’e, Delegasaun Timor-Leste sei hala’o mós reuniaun bilaterál ho Diretór Ezekutivu FMI Grupu Konstituente Brazíl ne’ebé mak Países Membru CPLP hanesan Timor-Leste, Cabo Verde no Brazíl hola parte ba.

Ministru Finansas, Rui Gomes no Governadór Banku Sentrál Timor-Leste, Abrão de Vasconcelos ne’ebé mós hanesan Governadór Suplente Timor-Leste iha FMI sei reprezenta Timor-Leste hodi partisipa iha reuniaun altu-nível ne’e.

Delegasaun Timor-Leste mós sei partisipa iha Reuniaun Ministeriál kona-ba “Dezenvolvimentu Umanu” iha ne’ebé Governadór Rui Gomes sei reprezenta Timor-Leste hodi hato’o Intervensaun konaba Dezenvolvimentu Umanu iha Timor-Leste - área prioridade importante ida husi Oitavu Governu Konstitusionál ne’ebé mak tau “EMA” nu’udar Sentru ba Dezenvolvimentu.

Entre reuniaun altu-nível hirak ne’e, Governadór Rui Gomes mós sei reprezenta Oitavu Governu Konstitusionál hodi hato’o Intervensaun iha Reuniaun Ministeriál entre Países Membrus g7+ ho tópiku: “Addressing Fragility and Conflict amid New Challenges”. Eventu ne’e organiza husi FMI servisu hamutuk ho Sekretariadu g7+ ne’ebé lidera husi Sekretáriu Jerál g7+, Helder da Costa.

Rekorda kada tinan, Oitavu Governu Konstitusionál lideradu husi Primeiru-Ministru, Jenerál Taur Matan Ruak aloka orsamentu millaun $1 ba Sekretariadu g7+ hodi apoiu g7+ nia servisu diplomasia iha nível internasionál – halo advokasia konaba polítika globál hodi responde ba konflitu no frajilidade.

Iha loron 16 fulan-abríl, Governadór Rui Gomes sei reprezenta Timor-Leste hodi partisipa no hato’o Intervensaun iha Reuniaun Ministeriál entre Grupu Vulnerável 20 (V20, sigla Inglés).

Durante partisipasaun iha Reuniaun Primavera nee, Governadór Rui Gomes ho Delegasaun Timor-Leste hetan akompañamentu husi Enkaregadu Negósius Embaixada Timor-Leste iha Washington DC, Embaixadór António Araújo.

Hafoin reuniaun hira ne’ebé delegaadu sira husi Timor-Leste partisipa mak Governadór Rui Gomes ho Delegasaun sei fila hikas mai Timor-Leste iha loron 17 fulan-abríl 2023. (*)