Tuir informasaun ne’ebé www.tempotimor.com, asesu iha pájina Ministériu Finansas, kinta (11/05) katak, kontribuisaun finanseira ne’e Governu oferese ba Igreja Católica liuhusi CET ba tinan orsamentál 2023 ho objetivu atu finansia atividades ho karaktér Edukativu, Sosiál, atividades governasaun eklesiál inklui atividades relasiona ho Jestaun subvensaun públiku iha Dioseze Díli, Baukau no Maliana.
Fontes orsamentu mai husi OJE 2023 ne’ebé aprova ona liuhusi Lei númeru 15/2022, 21 Dezembru, ne’ebé inskrita iha rúbrika títulu orsamentál “Dotacão Geral do Estado”, ba Finansiamentu Instituisaun Konfisoens Religiosas.
Rekorda iha loron 23 fulan-marsu liubá, Ministru Finansas, Rui Augusto Gomes reprezenta Oitavu Governu Konstitusionál no Sua Eminência Dom Virgílio Cardeal do Carmo da Silva, Pró-Prezidente CET asina ona akordu subvensaun públiku anuál ho montante millaun $15.
Sasin ba serimónia assinatura akordu ne’e Enkaregadu Negósius Nunsiatura Apostólika Santa Sé iha Díli, Monsenhor Marco Sprizzi; Prezidente CET no Bispu Maliana, Dom Norberto do Amaral; Administradór Diocese Baukau, Pe. Alípio Pinto Gusmão; Pe. Júlio Crispim Ximenes Belo; Pe. Leandro Maria Alves, atuál Bispu Dioseze Baukau; Diretór Ezekutivu ANAPMA, Ageu Cardoso; reprezentante Gabinete Primeiru-Ministru, José Leong inklui Diretór-Jerál Ministériu Finansas.
Iha ámbitu selebrasaun akordu ne’e, iha loron 13 fulan-marsu, liuhusi Despasu númeru 018/PM/III/2023, 13 Marsu, Primeiru-Ministru, Jenerál Taur Matan Ruak delega ona kompeténsia ba Ministru Finansas Rui Augusto Gomes hodi negosia no asina kontratu subvensaun anuál ho CET.
Iha 22 Marsu, Konsellu Ministrus aprova ona autorizasaun despesas subvensaun anuál ho montante $15 milhões ne’ebé aprezenta husi Ministru Finansas Rui Augusto Gomes. Iha reuniaun ne’e, Konsellu Ministrus mós autoriza Ministru Rui Gomes hodi reprezenta Oitavu Governu Konstitusionál asina akordu subvensaun anuál ho montante $15 milhões ho CET.
Akordu subvensaun públiku ho montante millaun $15 ne’e regulamenta akordu ne’ebé mak Estadu Timor-Leste no Estadu Santa Sé asina ona iha 14 Agostu 2015, hodi estabelese kuadru jurídiku ba relasaun entre Estadu rua, ne’ebé prevê ona iha artigu 11˚, fó konsesaun ba Igreja Katólika liuhusi kontribuisaun finanseira anuál. (*)
