Tuir informasaun ne’ebé www.tempotimor.com, asesu iha pájina Ministériu Finansas, kinta (11/05) katak, orsamentu ba konstrusaun Igreja foun ne’e mai husi Orsamentu Jerál Estadu (OJE) 2023 ne’ebé inskrita iha rúbrika títulu orsamentál “Dotacão Geral do Estado”, finansiamentu despesas ba konstrusaun Igreja foun Parókia São Paulo Lospalos iha Munisípiu Lautém ho montante millaun $1.
Rekorda iha loron 4 fulan-abríl 2023, Ministru Finansas, Rui Gomes ho Prezidente Komisaun Konstrusaun Igreja Foun São Paulo Lospalos, Júlio Maria de Jesus Canto, asina ona akordu subvensaun públiku ho montante millaun $1. Sasin ba asinatura akordu ne’e Administradór Diocese Baucau, Pe. Alípio Gusmão, Provinsiál Salesiano Timor-Leste, Pe. Anacleto Pires, SDB no Pároco Parókia São Paulo Lospalos, Pe. Venâncio Fátima Freitas, SDB.
Iha kontestu selebrasaun akordu ne’e, Primeiru-Ministru, Jenerál Taur Matan Ruak liuhusi Despacho númeru 020/PM/III/2023, 13 Marsu 2023, delega ona kompeténsia ba Ministru Finansas atu negósia no asina kontratu subvensaun públiku ba finansiamentu despesas relasiona ho konstrusaun Igreja Foun Parókia São Paulo Lospalos.
“Hodi naran Oitavu Governu Konstitusionál tomak nia naran, ami husu ba Komisaun Konstrusaun atu iha futuru fornese relatóriu, assegura transparénsia ba despesas sira, halo boa jestaun ba rekursus ne’ebé iha, no fiskaliza atividade tomak durante prosesu konstrusaun,” Ministru Finansas, Rui Gomes hatete. (*)
