“Defaktu iha semana ida ne'e ita prosesa ona transferénsia ba orsamentu sira atu halo implementasaun ba uma kbi'it la'ek”, dehan Ministru Administrasaun Estatál, Miguel Pereira de Carvalho, hafoin finaliza enkontru ho Prezidente Repúblika (PR), Francisco Guterres ‘Lú Olo’, iha Palásiu Prezidensiál, Bairopite, segunda (25/04).
Tanba Orsamentu Jerál Estadu (OJE) ho montante millaun $102 ba Ministériu Administrasaun Estatál iha tinan 2022 aloka barak liuba konstrusaun uma kbi'it la'ek hamutuk rihun-4 ne'ebé mak nia prosesu identifikasaun ba benifisiáriu sira konklui hotu ona.
Maibé felizmente ezekusaun tinan ne'e la'o di'ak, iha faze ida ne'e ezekusaun konsege atinje besik ona pursentu ruanolu (20%), tanba ne’e ezekusaun ne'e sei bele atinje to'o pursentu 35.
Tanba ne'e, iha fulan ne'e, sei halo tranferénsia orsamentu ba suku sira, atu hahú halo ona konstrusaun ba uma kbi'it la'ek hamutuk rihun-haat ne'e. (*)
