“Loron 25 Abril hanesan loron liberdade espresaun ne'ebe Timor hetan. Nune'e, ha’u asume fali kargu hanesan Prezidenti Konsellu Imprensa (KI). Agradese tebes ba Konsileiru KI, Expédito Diaz ne'ebé durante asume kna'ar hanesan prezidente interinu prezide enkontru ezekutivu no plenária sira liuliu servisu Konsellu Imprensa tau matan ba mídia sira iha ámbitu períodu kampaña eleitorál ninian”, dehan Prezidente Konsellu Imprensa (KI), Virgilio Guterres, iha Salaun KI, Kintal Boot, segunda (25/04).
Iha loron 24 fevereiru 2022, Virgilio Guterres iha direitu atu ko’alia kona-ba Pólitika ka afilia ba partidu ruma maibé hahú agora ba oin iha intervensaun ba de’it Konsellu Imprensa nia interese ba liberdade Impresa no liberdade espresaun.
“Ne'e tradisaun ne'ebe KI sempre halo bainhira dispensasi ha’u-nia kargu hodi konkore ba eleisaun prezidensial liuhusi Konferénsia Imprensa no agora mós liuhusi Konferénsia Imprensa atu hato'o ba públiku katak ha’u asume fali ha’u-nia kargu hanesan prezidente Konsellu Imprensa (KI)”, afirma nia.
Prezidenti Interinu Konsellu Imprensa (KI), Expédito Diad Ximenes hatete, durante fulan tolu, asume kna'ar hanesan Prezidente Interinu Konsellu Imprensa (KI) tanba Prezidente Konsellu Imprensa Virgilio Guterres tuir konkorente ba eleisaun prezidensiál no dispensasi ne'ebé KI fó ba Virgilio Guterres mak durasaun fulan tolu,
“Ohin loron 25 Abril hala'o fali kna'ar hanesan Prezidente KI. Nune'e, ha’u entrega fali kargu prezidente interinu ba Prezidente KI anual hodi hala'o funsaun hanesan babain”, dehan nia.
Tanba ne’e, agradese tebes ba mídia hothotu nia kolabolarasaun no servisu hamutuk nune'e KI iha ninia Ekipa Monitorizasaun halo avaliasaun ba produtu jornalizmu iha eleisaun prezidensiál primeira volta no segundu volta sei entrega ba mídia sira iha tempu badak.
“Agradese mós ba mídia sira tanba hadutu duni imparsialidade no neutralidade iha atividade jornalista durante fulan-tolu iha eleisaun Prezidensiál”, dehan nia. (*)