“Ha'u sente onrandu tebes no agradese eleitór ida-idak ne'ebé fó fiar nafatin ba ha'u atu sai dala ida tan Prezidente Repúblika, konfiansa ne'e ha'u simu uluk liuhusi maluk rihun-atusida-ruanulu-resin-lima ne'ebé asina petisaun no husu ba ha'u atu kandidata-an dala ida tan ba Prezidente Republika”, dehan Reprezentante Ekipa Susesu Kandidatu Lú Olo, Fernando Dias Gosmão, iha Sede Kandidatu Ótel Luz Clarita, Formoza, kinta (24/03).
Ba konfiansa ne'e mai husi veteranu, jerasaun patriota, husi katuas-ferik to'o Juventude loriku as’uain tomak, mai husi natar-na’in no tos na'in sira, produtór kafe, traballadór iha setór públiku no privadu, estudante sira, intelektual no akadémiku sira, husi munisípiu hothotu no Rejiaun Adminitrativu Espesiál Oekussi Ambeno (RAEOA).
"Ha'u agradese apoiu tomak no inkondisionál husi partidu FRETILIN ne'ebé mobiliza ninia rekursu umanu no lojistiku hodi apoia ha'u-nia kampañia tomak. Ha'u agradese mós apoiu husi partidu “Os Verdes”, Kuadru PLP no PUDD, organizasaun Kolimau 2000, organizasaun hothotu no sidadaun ida-idak ba ha'u-nia kandidatura daruak”, hatete nia.
Tanba husi konfiansa no apoiu sira ne'e hotu, habrane tebes kandidatu Lú Olo, ba kampaña hodi husu ba Povu vota ba nia atu sai Prezidente Republika ba Timor-Leste no ba Povu tomak.
Iha ne’e kontente tebes votasaun iha 19 marsu 2019, la’o ho hakmatek, livre, demokrátiku no ho órden. Tanba ne’e hatudu Povu hakarak tebes moris iha ámbiente paz, trankilidade no estabilidade.
“Ámbiente ne'e ba ha'u sempre promove no tanen ha'u-nia mandatu nu'udar Prezidente Republika, ha'u saúda kandidatu hothotu ne'ebé esforsa-an atu kampaña eleitorál la'o iha ámbiente hakmatek to'o loron votasaun iha loron 19 marsu”, deklara nia.
Husi ne’e, fó obrigadu ba esforsu tomak husi Tribunál Rekursu ba prosesu verifikasaun kandidatura, husi orgauns eleitorál, STAE no CNE, nomós husi ema hotu ne'ebé partisipa iha prosesu eleitorál hanesan fiskál, observadór nasionál no internasionál, nomós Polísia Nasionál Timor-Leste (PNTL) ne'ebé mantein orden di’ak iha teritóriu tomak.
“Ha’u fiar katak ita sei tama iha segunda kampaña ho ambiente hanesan kampaña daruak tanba ida ne’e mak vontade Povu Timor-Leste nian no ita ita-idak tenke haksolok”, haktenik nia.
Kandidatu mós katak sei atua di’ak liután iha segunda kampaña no kandidatu ida-idak bele hato’o ninia kompromisu loloos ba Povu nu’udar Prezidente Repúblika. Nune’e mós liafuan ne’ebé sei hasae atu manán konfiansa Povu nian tenke halo ho maturidade polítika no seriedade, nu’udar ezemplu di’ak atu sidadaun hothotu no jerasaun foinsa’e bele banate tuir iha eleisaun sira tuir mai.
“Nu’udar kandidatu ba Prezidente Repúblika, ha’u husu deskulpa karik ha’u ka ha’u-nia apoiante ruma ofende ema ruma iha kampaña hala’o husi 2 marsu to’o 16 marsu 2022’’, haktui Fernando. (*)
