Tanba Kandidatu ne’ebé kompete iha Primeira volta hamutuk na’in-16, maibé laiha kandidatu ida mak manán eleisaun ho votu metade husi totál votu validu, nune’e sei iha eleisaun segunda volta ho kandidatu na'in-rua.
Diretór Kampaña Kandidatu Prezidnete Republika Francisco Guterres 'Lú Olo', José Manuel Fernandes 'Nakfilak' deklara, Tenente Jeneral reformadu, Lere Anan Timur, sei ba hamutuk ho FRETILIN hodi fó vitória ba Kandidatu Prezidente Repúblika, Francisco Guterres ‘Lú Olo’, iha eleisaun segunda volta ba eleisaun prezidensiál.
“Tanba ne'e nia sei kontinua ema FRETILIN, no nia sei mai hamutuk ho ami FRETILIN hodi fó vitória ba Kandidatu Prezidente Repúblika, Francisco Guterres ‘Lú Olo”, dehan José Manuel 'Nakfilak', iha Salaun Luz Clarita Bairru Formoza, kinta (24/03).
Tanba Jenerál Lere nanis kedas nia tau farda deklara ona dehan nia ema FRETILIN, agora mak dehan nia la'ós fali FRETILIN ne'e ema seluk mak dehan, maibé sira nunka hatete ida ne'e.
Maske iha primeiru volta militante FRETILIN fahe ba rua tanba, Kandidatu Lere Anan Timur iha, maibé segundu volta kandidatu FRETILIN mak úniku de'it ona, entaun sei garante militante sira sei fila hotu mai vota ba Lú Olo.
“Siknifika sira hatene sira-nia kandidatu mak se, tanba laiha tan kandidatu rua, no agora aprosimasuan kontinua la'o, militante sira mós sei lori konsiénsia rasik hodi lori votu mai fó vitória ba Kandidatu Francisco Guterres Lú Olo”, afirma nia.
Ba eleisaun ne’e sei hetan apoiu husi Partidu Polítiku no kandidatu sira seluk ne’ebé la kongese avansa ba segunda volta sei hamutuk ho Prezidente Partidu PLP, hanesan Primeiru Ministru ne’ebé hamutuk ho Fretili, sei fó apoiu ba kandidatu Prezidente Repúblika Lú Olo.
“Jeneral Taur mós sei hamutuk, tanba governasaun ida ne'e ita bele dehan Jeneral Taur Matan Ruak nian, entaun nia sei hamutuk hodi kontra ema ida ne'ebé mak hakarak mai dizolve Parlamentu ne'e”, deklara Jos’e Manuel.
Ba rezultadu finál Provizóriu ne’ebé fó sai husi Orgaun eleitorál hanesan Sekretáriadu Tékniku Administrasaun Eleitorál (STAE) iha loron segunda (21/03) hatudu Kandidatu Prezidente Repúblika (PR), José Ramos Horta, ho Kandidatu Francisco Guterres ‘Lú Olo, posibilidade sei hadau malu kadeira Prezidente Repúblika ba Períodu 2022-2027, iha eleisaun segunda volta iha loron 19 abril 2022.
Tanba ne’e, kandidatu na’in-rua hanesan Prezidente Repúblika (PR), José Ramos Horta, konsege manán kandidatu na’in-15 sira seluk ho votu 301481 no hetan pursentu 46,58 (46,58%), husi totál votu validu ne’ebé apuradu husi STAE hamutuk 647172 kompara ho Kandidatu Francisco Guterres ‘Lú Olo, ne’ebé hetan votu 143408 ho pursentu 22,16%, iha pozisaun segundu
Haree ba rezultadu apuramentu ne’ebé fó sai ho votu validu hamutuk 647172 ho pursentu 100 konklui ona rezultadu finál ho kandidatu na’in-16 laiha ida mak hetan votu metade husi totál votu validu iha eleisaun.
Tanba konstituisaun Repúblika Demokrátika Timor-Leste, Artigu 76.o Ne’ebé ko’alia kona-ba Eleisaun, iha aliña dahuluk hatete, Atu sai Prezidente-Repúblika, sei hili tuir sufrájiu universál, livre, diretu, sekretu no ida-idak.
Iha aliña daruak hatete, Eleisaun Prezidente-Repúblika nian banati tuir sistema manán ho votu barak liuhusi votu hothotu ne’ebé válidu, la sura votu ne’ebé la válidu.
Nune’e mós iha aliña datoluk hatete, wainhira kandidatu sira hetan votu hanesan, sei hala’o fali eleisaun dala ida tan, liutiha loron tolunulu husi loron votasaun ida foin liubá kotuk. No ikus liu aliña dahaat katak, iha eleisaun darua, kandidatu na’in-rua ne’ebé hetan liu votu no la hasai sira-nia kandidatura mak bele tuir.
Husi rezultadu provizóriu eleisaun Prezidensiál ne’ebé fó sai ona, Kandidatu José Remos Horta ho votu 301481 (46,58%), Francisco Guterres ‘Lú Olo’ ho votu 143408 (22,16%), Armanda Berta dos Santo votu 56289 (8,70%), Lere Anan Timur iha votu 48959 (7,57%), Mariano ‘Assanami’ Sabino votu 47008 (7,26%), Anacleto Ferreira ho votu 13059 (2,02%), Martinho Gusmão iha votu 8485 (1,31%) no Hermes da Rosa Correia Barros konsege hetan votu 7958 (1,23%).
Maibé kandidatu na’in-ida sira seluk hanesan Milena Pires de’it mak kjonsege hakat liu bareira apoiante ba aprezentasaun kandidatu iha Tribunál rekursu ho votu 5335 (0,82%)
Ba kandidatu na’in-7 sira seluk ne’ebé la konsege atinje rekejitu ne’ebé Tribunál Supremu Justisa fó sai katak kandidatu ida tenke iha apoiante mínimu rihun-lima mak hanesan Isabel Ferreira iha votu 4165 (0,64%), Felisberto Araujo Duarte hanesan kantudantu ho otas nurak iha votu 2615 (0,40%), Constancio Pinto ne’ebé konsege gaña votu 2474 (0,38%), Rogerio Lobato iha votu 2028 (0,31%), Virgilio Guterres ho votu 1685 (0,26%), Antero Bendito da Silva ho votu 1531 (0,24%) no ikus liu Knadidatu Angela Freitas iha votu 692 (0,11%). (*)
