“Ida ne'e Komisaun Nasionál ba Eleisaun sira (CNE) tenke rekomenda ba tribunál, ema ruma tenke asume responsabilidade ida ne'e, ne'e halimar ho ema nia diretu votu, tanba dever síviku ne'e konsagra iha ita-nia Konstituisaun Repúblika. Violasaun ida diretu síviku iha sentru paralelu, ema sira ne'ebé autór ba ne'e tenke asume responsabilidade”, dehan Reprezentante Kandidatu Ekipa Susesu Kandidatu José Ramos Horta, Tomas Cabral, iha edifísiu CNE, Kolmera, kinta (24/03).
Tanba kriasaun Sentru paralelu ne'e hamosu konfuzaun bainhira ema ba vota, uluk kuandu lori lei ne'e ba komisaun A, ida ne'e ema nota ona katak sentru paralelu ne'e sei difikulta prosesu tomak no ikus mai konsege difikulta ema rihun-rua labele tuir votasaun.
Ba sira ne'ebé organiza sentru refere tenke asume responsbilidade ida ne'e. Tanba realidade hatudu ona iha sentru paralelu balun, la'os orgaun eleitorál sira mak ba halo intervensaun, maibé orgaun polítiku sira mak ba ko'alia fali.
“Situasaun ida ne'e mak ladún di'ak, ita lakon diretu sìviku ema rihun-rua”, afirma nia.
Maske sentru votasaun paralelu aplika nafatin iha eleisaun segundu volta nian, maibé husu tenke asegura nia funsiomanetu ne'e ho di'ak. (*)