"Ita ohin ne'e, tenke hakas hotu, aban uma ora tenke transporta ba Dili, tuir lei apuramentu hotu tenke lori ba, ohin ne'e mak loron karik hotu, hotu ita lori ba, mais kalan madrugada, entaun depois meudia ita foin lori ba Dili," dehan diretór STAE Baukau, Lucio Salvador Freitas iha salaun apuramentu Baukau, segunda (21/03).

Hafoin kontajen votus remata iha apuramentu Munísipal, iha loron 21 fulan-marsu tinan-2022 parte madrugada tuku 3:00, maibé tuir planu sei lori ba Komisaun Nasionál Eleisaun (CNE-sigla portugés) nasionál iha tuku 01:00 parte loraik no sei akompaña husi Polísia Nasionál Timor-Leste (PNTL) Munísipiu Baukau.

"Segúransa ne'e dever, tenke akompaña, tanba matérial ne'e siensetivu, tanba rezultadu husi sentru votasaun 125 ne'e iha hotu ona urnas neen nia laran atu lori ba Dili," nia hatete

Ékipa responsavél Sekretáriadu Tékniku Administrasaun Eleitórál (STAE) Munísipiu Baukau, hahú tabulasaun ba rezultadu apuramentu Munísipal husi tuku 08:00 iha loron 19 fulan-marsu tinan-2022 (horseik) parte kalan, no to'o  loron 21 fulan-marsu tinan-2022 parte tuku 3:00 parte mardugada (ohin).

Durante ékipa STAE Baukau halo tabulasaun ba akta 125 iha apuramentu Munísipal, rezultadu tabulasaun ne'ebé www.tempotimor.com asesu, tuir dadus totál eleitóres iha Munísipiu Baukau, ne'ebé STAE Baukau rejistradu tuir votasaun hamutuk 96.207, vota iha sentru votasaun paralelu hamutuk-533 totál votante hamutuk 95.674.

Maibé, partisipa iha votasaun hamutuk 71,137 ho taxa partisipasaun hamutuk pursentu 74,35 kompostu husi mane na'in-36,211 no feto na'in-34,926.

Votu abandonadu 17 ho pursentu 0,02 votu nulu 2,035 ho pursentu 2,86, votu branku 595 ho pursentu 0,84, votu reklamadu 93 ho pursentu 0,13, votu rejeitadu 4 ho pursentu 0,01 no totál votu validu hamutuk 68,393 ho pursentu 96,14.

"Votus nulu ho votus branku sira ne'e, lei la fó dalan ita rejolve iha apuramentu Munísipal, lei fó autorizasaun lori ba apuramentu nasionál, tanba tuir lei Nu.15/2022 ne'e iha nasionál," nia informa

 Husi tabulasaun apuramentu Munísipal, hetan rezultadu finál, kandidatura Prezidente Repúblika ho númeru sorteiu 6, Francisco Guterres Lu Olo lidera Munísipiu Baukau ho pursentu 40,15 husi votantes 27,463.

Tuir kandidatura númeru sorteiu 14, Ramos Horta iha segundu lugar hetan pursentu votus 23,25 husi votantes 15,898 no kandidatura númeru sorteiu 8, Lere Anan Timur okupa terseiru lugar hetan pursentu 16,62 husi votantes 11,370.

Enkuantu kandidatu númeru sorteiu 1, Isabel Ferreira hetan pursentu 0,69 husi eleitóres 474, kandidatu númeru sorteiu 2, Hermes da Rosa Barros hetan pursentu 1,02 husi eleitóres 699, kandidatu númeru sorteiu 3, Maria Angela Freitas hetan pursentu 0,07 husi eleitóres 48, kandidatu númeru sorteiu 4, Rogériu Tiago Lobato hetan pursentu 0,29 husi eleitóres 198.

Kandidatu númeru sorteiu 5, Anacleto Bento Ferreira hetan pursentu 0,54 husi eleitóres 366, kandidatu númeru sorteiu 7, Maria Milena Lopes de Jesus Pires hetan pursentu 1,11 husi eleitóres 759, kandidatu númeru sorteiu 9, Armanda Berta dos Santos  hetan pursentu 7,51 husi eleitóres 5,135.

Kandidatu númeru sorteiu 10, Antero Bendito hetan pursentu 0,31 husi eleitóres 214, kandidatu númeru sorteiu 11, Constáncio Pinto hetan pursentu 0,46 husi eleitóres 314, kandidatu númeru sorteiu 12, Virgílio Guterres hetan pursentu 0,40 husi eleitóres 276.

Kandidatu númeru sorteiu 13, Martinho Gusmão  hetan pursentu 1,19 husi eleitóres 816, kandidatu númeru sorteiu 15, Felizberto Araujo Duarte hetan pursentu 0,13 husi eleitóres 213 no kandidatu númeru sorteiu 16, Mariano Asanami Sabino hetan pursentu 6,07 husi eleitóres 4,150.

Durante apuramentu Munísipal, hetan observasaun husi observadór internasionál União Europeia, Ofisiál Supervizaun husi CNE Baukau, Brigada husi STAE Munísipiu no Fiskais husi kandidatu PR iha Munísipiu Baukau, no hetan segúransa masimu husi PNTL Baukau.

Enkuantu kaixa ne'ebé STAE Baukau simu husi nasionál, hamutuk 38 kompostu husi livru 2.174, aumenta pursentu 10 atinji to'o 108.700 foilla votu no urna ne'ebé STAE Baukau distribui iha loron 18 fulan-marsu tinan-2022 ba sentru votasaun iha Munísipiu Baukau hamutuk 457.

Entertantu Munísipiu Baukau rasik kompostu husi Postu Adminisitrativu-6 hanesan, Postu Baukau Vila, Baguia, Laga, Kelikai, Venilale no Vemase, ne’ebé iha sentru votasaun hamutuk 125 ho estasaun votasaun hamutuk 150. (*)