“Bankada CNRT husu Governu halo full up ka aselera prosesu halo akordu ho nasaun Japaun no Alemaña ne'ebé mós presiza forsa traballu iha sira-nia rai, atu nune'e Governu bele fasilita no iha kontrolu ba joven sira ne'ebé hakarak ba servisu iha rai-liur”, dehan Deputadu CNRT, Vergina Ana Belo liuhusi deklarasaun polítika iha plenária PN, tersa (28/06).
Tanba haree ba diskusaun ne'ebé mak iha katak nasaun Japaun ho Alemaña rasik mós presiza hela forsa traballau iha sira-nia rai, entaun presiza full up para oinsá mak aselera lalais akordu entre Timor-Leste ho Japaun no Alemaña hodi fasilita timoroan sira hakarak ba servisu iha ne'ebá, nune'e evita joven sira monu ba kriminozu sira-nia manipulasaun.
Bankada CNRT ko'alia ne'e tanba esperiénsia hatudu ona iha pasadu bainhira Prezidente Repúblika, Kay Rala Xanana Gusmão, diskute ho Prezidente husi Cuba, kona-ba kooperasaun iha área Medisina nian, ne'ebé ikus mai Governu halo full up no haruka duni Timoroan sira ba estuda iha Cuba atu sai médiku.
Ba situasaun ne'e tenke aplika hikas agora tanba foin lalais iha ona diskusaun entre Prezidente Republika Portugal ho Prezidente RDTL kona-ba oinsá atu fasilita joven sira bele servisu iha nasaun sira iha Europeia. (*)