Ba ajenda alargada ne'ebé Taur Matan Ruak hala'o ho Kandidatu Lere Anan Timur iha rezidénsia Farol ne'e, parte ekipa mídia nasionál inklui média online www.tempotimor.com rasik seidauk asesu, tanba ajenda ne'ebé mosu urijente.

Ho ajenda ne’e, tanba eleisaun prezidensiál ne’ebé la’o ho di’ak, mak Primeiru Ministru, Taur Matan Ruak, hanesan maun alin durante luta no ukun-an nia laran deside vizita hodi komprimenta no fó parabéns ba Jenerál Reformadu Lere Anan Timur.

“Ha'u fó Komprimenta, no husu parabéns tanba bele kontribui ba eleisaun ida Pasífiku ne'ebé di'ak”, dehan PM Taur ba jornalista iha Rezidénsia Lere Anan Timur, Faról, segunda (21/03).

Alende ne'e Jenerál Reformadu Lere Anan Timur hatete, iha vizita PM Taur ne'e hato'o nia solidariedade hanesan maun alin.

“Ohin Primeiru Ministru mai ne'e la'ós Primeiru Ministru mak mai, ne'e ha'u nia alin Taur mak mai, tanba nia hatene katak ha'u la passa ba kandidatu eleisaun prezidensiál, ne'e mak hanesan nu'udar maun alin mai, ami la trata buat seluk, laiha liafuan seluk, nu'udar maun alin, nia Solidariedade nia mai vizita de'it ha'u”, afirma nia. (*)