“Jenerál nia pozisaun nafatin konsistente katak, lideransa sira tenke hamutuk atu lori nasaun no estadu ne'e ba oin”, dehan Ekipa Susesu Kandidatu Prezidente Republika (PR), Lere Anan Timur, liuhusi komunikadu imprensa ne'ebe www.tempotimor.com asesu, segunda (21/03).
Tanba enkontru Ekipa Vitória ho Jenerál Lere Anan Timur (LAT) iha loron domingu (20/3) kalan katak, Jenerál dala ida tan hato'o nia agradesimentu tomak ba parte hotu ne'ebé fó ona sira-nia apoiu ba nia kandidatura.
Iha ne’e, Jenerál Lere mós hato'o nia sentidu profundu ba familia koordenador Rejiaun Administrativa Espesiál Oekussi Ambeno (RAEOA), António Lelan. “Ita husu ba Aman-Maromak atubele simu nia iha Nia kadunan santu”.
Nune’e, Jenerál Lere mós hatan ba preokupasaun públiku ba nia pozisaun polítika durante iha komísiu kampaña. Tanba ne’e husu nafatin ba timoroan hotu atu iha unidade nasionál ba dame, ba armonia, ba respeitu mutuo nomós ba lideransa tomak atu hadomi malu nafatin.
Jeneral Lere mós promete iha tempu badak sei fó sai nia hanoin ida wainhira apuramentu nasionál finalizadu ona.
“Wainhira apuramentu nasionál finalizadu ona, J-LAT sei halo komunikadu imprensa ida atu informa ba públiku kona-ba nia hanoin sira tuir mai”, haktuir iha komunikadu ne'e. (*)