“Ita prepara ona atu haruka ba Ministériu Finansa oinsá atu halo pagamentu”, dehan nia hafoin audénsia ho Prezidente Repúblika, José Ramos Horta, iha Palásiu Prezidensiál, Bairro Pite, segunda (27/06).

Tuir Lei eleisaun prezidensiál no eleisaun, kandidatu sira ne'ebé konkore ona iha eleisaun hothotu sei hetan subvensaun $4 kada votu ne’ebé hetan.

Nune'e subvensaun, kada eis kandidatu Prezidente Repúblika 2022-2027 né'ebé mak CNE prosesa la haree ba boot ka ki'ik, maibé hothotu iha direitu atu hetan subvensaun.

Maibé ko'alia montante orsamentu ne’e depende ba kada kandidatu sira hetan votu hira, tanba ne’e téknikamente CNE sei haree atu sira ne’ebé manán votu barak liu, sira iha direitu boot liu, no sira ne’ebé manán uitoan sei hetan oituan.

“Ne’ebé, ha’u hanoin ne’e normál tanba lei dehan $4 kada votu”, esplika nia.

Kona-b votu, antes ne'e Prezidente Repúblika, José Ramos Horta hetan votu 387,145, no eis kandidatu Prezidente Repúblika, Francisco Guterres ‘Lú Olo’ hetan votu 242,440, Armanda Berta dos Santos hetan votu 42,315, no Mariano ‘Assanami’ Sabino Lopes hetan votu 33,550, inklui Eis Tenente Jenerál, F-FDTL, Tito da Costa Cristovão ‘Lere Anan Timur’ hetan votu 31,640.

Ba Kandidatu Prezidente Repúblika, Anacleto Bento Perreira hetan votu 9,702, kandidatu PR Martinho da Silva Gusmão hetan votu  6,373, Hermes da Rosa Correia Barros ho votu 5,256.

Ba kandidatura Isabel da Costa Ferreira ne'e hetan votu 3,019, no Maria Helena de Jesus Lopes Pires iha votu 2,950, Felizberto Araújo Duarte ho votu 1,989, nomós Constancio da Conceição Pinto hetan votu 1,831, inklui Rogério Tiago F. Lobato hetan votu 1,583.

Aleinde kandidatu Antero Benedito da Silva hetan votu 1,120, kandidatu Virgílio da Silva Guterres hetan votu 1,088, no Maria Angela Freitas da Silva hetan votu 533. (*)