“Se uluk ukun rasik-an ita mak determina, liberta ita-nia an husi ki'ak, ita mak determina rasik ba ita-nia moris di'ak, la'ós ema seluk mak mai determina ita-nia moris di'ak. Tanba ne'e tempu to’o ona mai ita hotu hamutuk, sai sujeitu iha porsesu ida ne’e atu liberta ita-nia an husi kiak, la depende ba ema seluk”, dehan Isabel da Costa Ferreira iha kampaña eleitorál, Suku Komoro, domingu (13/03).

Tanba, kandidatura ne'ebé Isabel da Costa Ferreira aprezenta, sei sai hanesan Prezidente Repúblika ida ne'ebé prosimu, aktivu, no hakarak habesik-an ba hamutuk ho família kbi'it la'ek sira ne'ebé laiha lian inklui joven no labarik sira.

Kompromisu ida ne'e, nu’udar inisiativa ida husi Isabel Ferreira liuhusi servisu hamutuk ho organizasaun sosiedade sivíl no Governu inklui hamutuk mós ho organizasaun sira ne'ebé hakarak apoiu Estadu atubele hatudu dalan hanusa mak bele sai husi terus no ki'ak.

Atu realiza buat hirak ne'e, presiza mós halo sakrifisu no servisu badinas, hodi hisik kosar ba moris di'ak, la depende ba ema seluk. Tanba liberta-an husi ki’ak ne'e la'ós pasivu no depende liuba politiku sira, maibé dalan úniku ne'ebe atu ajuda liberta-an mak edukasaun.

Bainhira ko'alia kona-ba edukasaun, ne'e tenke iha tratamentu dignu ba Timoroan hotu tanba timoroan maioria ki'ak, nia oan la matenek, no laiha oportunidade ba servisu maka sei la responde ba objetivu atu hasai povu husi ki'ak.

Tanba ne'e, kandidata Isabel da Costa Ferreira husu timoroan tomak tempu ona atu hamutuk liberta sira-nia an husi moris ki'ak liuhusi dalan eleisaun.

Purtantu kona-ba kestaun laen Primeiru Ministru, feen Prezidente Repúblika ne'e tanba haree ba situasaun real povu nian iha era ukun-an nian.

Bainhirera hanoin ba nia-an no familia de'it, ida ne'e la presiza buka kargu hanesan Primeiru Ministru ka Prezidente Republika.

Iha momentu Jenerál Taur Matan Ruak sei militar mós nia nunka hakarak sai politiku, inklui kandidata Isabel da Costa Ferreira hanesan mós ativista nunka hakarak sai polítika maibé tanba haree ba situasaun povu ultrapasa iha era ukun rasik-an.

“Tanba ne'e halo ami tenke ser halo desizaun ida atu kontribui tan iha dezenvolvimentu ba nasaun ida ne'e, tanba ho hanoin ida de’it haree povu barak mak sei moris terus no ki’ak nafatin”, deklara nia. (*)