“Ita presiza partisipa ho laran moos hodi hili ita-nia prezidente, ita nu'udar povu eleitu, povu Saserdotál povu Maromak ninian, irmaun sira liafuan ne'e importante la halimar, ita sira ne'e mak Maromak hili ona ita sai ona ninia povu Saserdotál ne'ebé intersede ne'ebé halo orasaun ba Maromak, katak ita hili ema ida ne'ebé eleitu ba ita-nia prezidente ho fuan moos laran moos ho respeitu no fó honra hodi ukun ita-nia nasaun Timor-Leste”,  dehan nia liuhusi nia pregasaun iha IEAD Vilaverde, domingu (13/03).

Pregasaun ne'e ko'alia kona-ba hili liderasun tanba iha Governu Timor-Leste deside ona katak iha loron 19 fulan-marsu sidadaun hothotu ne'ebé mak iha ona kartaun eleitorál sei ba hotu sentru votasaun hodi hili ema ida ba Prezidente Repúblika ba tinan 2022-2027.

Alende nia iha tempu uluk Maromak rasik mak ukun povu ho naran teokrasia no ikus mak mosu sistema monarákia mai to'o demokrasia.

“Tuir Bíblia iha Governasaun lubun ida mak liu ona, mak Maromak nia vontade tan Maromak nia hakarak, uluk liu Maromak mak ukun bolu naran Teokrasia, nia ukun ho nia lei kanonika sira hotu ne'ebé nia fó ba Profeta Moises hodi ukun hodi dirije hodi fo konsellu hodi orienta povu Israel hodi nasaun ida”, afirma nia.

Lei kanonika ne'e siknifika katak Maromak rasik mak hakerek lei kona-ba ukun nia hodi entrega ba Profeta Moises hodi povu sira moris tuir lei hirak ne'ebé nia simu.

“Maromak nia ukun ne'e hahú husi profeta Moises no remata iha Profeta Samuel nia tempu”, esplika nia.

Tuir Bíblia ne'ebé konta hafoin lei Teokrasia ne'e hotu halo povu Israel barak halai namkari nune'e iha Pofeta Samuel, nia tempu Pofeta Samuel hili ninia oan hodi sai fali liurai ba Israel sira hodi ulun Israel sira.

“Ikus liu mak Pofeta Samuel, buat hotu komesa organizadu, maibé to'o Profeta Samuel Katuas liu no labele la'o ba la'o mai hodi kontrola povu Israel sira, nia foti nia oan na'in-rua hodi ukun povu Israel”, hkalaken nia.

Tanba hahú husi Governasaun Teokrasia ne'e Maromak rasik mak hili lideransa maibé to'o iha Profeta Samuel, nia rasik mak hili nia oan hodi ukun, nune'e Governasaun ida ne'ebé hanaran Monarkia.

Ikus mai Biblia kontinua esplika to'o konsege mosu duni Governasaun ida ne'ebé povu rasik mak hili nia liurai ida hodi ukun nia povu sira.

Tuir Bíblia iha Livru 1 Liurai Kapitulu 12 Versikulu 1 “Depois Roboão baa Sikém, tanba ema Israel hotu mai ona iha Sikém hodi halo nia liurai”.

Iha kontekstu Bíblia ida ne'e iha nia esplikasaun hahú husi Governasaun Primeiru ne'ebé hanaran Teokrasia katak, Maromak mak ukun, no Governasaun segundu ne'ebé Liurai hili nia oan sira hodi ukun ne'ebé hanaran Monarkia, no ikus liu iha povu rasik mak hili nia lideransa ida hodi sai liurai iha nasaun ida. (*)