Maske apoiante sira ne’ebé hamrik metin iha udan laran hodi akompaña Kampaña, Koordenadór Partidu Congresso Nacional de Reconstrução de Timor (CNRT) Munisípiu Manufahi, Patrocino Fernandes hatete, nia parte fiar katak situasuan udan ne'ebé mosu iha komísiu kampaña loron danen ida ne'e hanesan ksolok no triste ida ne'ebe oferese husi natureza tanba ho situasaun krize polítika no ekonómia ne'ebé mak mosu durante tinan lima.

“Mesmu ho udan maibé ha’u fiar katak natureza mós haksolok ho ita, sira mós sente triste ba situasaun tinan lima ne'ebé ita hothotu enfrenta, nune'e ohin sira hakarak sente mós triste hamutuk ho ita”, dehan nia, iha kampaña eleitorál, Same Vila, segunda (07/03).

Tanba ne'e, lori estrutura tomak, militante no simpatizante partidu CNRT, no movimentu sira husi Munisípiu Manufahi nian hato'o benvindu ba kandidatu José Ranos Horta ho ekipa ne'ebé mak sei halo kompromisu polítika ba Povu Manufahi.

"Ha’u fiar katak ita-boot sira hotu ohin loron mai iha ne'e, mai atu rona kompromisu didi'ak, hodi deside didi’ak iha dia 19 marsu, ita hothotu atu fó votu ba ita-nia kandidatu José Ramos Horta, hodi hatuur hikas fali ita-nia orden konstituisaun no lei sira seluk ne'ebé mak tinan-tinan iha ona, atu besik ita-nia maun sira halakon tiha, e hakanek indiretamente rihun-atusrua ne'ebé mak mate, ne'ebé lori sira-nia isin ho ruin hodi sosa”, afirma nia.

Ba eventu polítika ne’e, hetan partisipasaun másimu husi apoiante no simpazitante partidu CNRT, inklui partidu polítiku balun no movimentu sira kuaze liu 2-resin.

Iha kampaña ne’e observa direta husi Komisaun Nasionál ba Eleisaun sira (CNE), no seguransa husi Polísia Nasionál Timor-Leste (PNTL). (*)