“Ami haree katak, debate ne'e podia ita halo iha televizaun RTTL nian koordenasaun, ho razaun tanba RTTL nia koobertura ne'e ba Timor laran tomak, e rádiu RTTL ne'e, bele fó sai koobertura ne'e luan liután, ita kompara ho GMN TV ne'ebé mak ninia kobertura la boot, la luan hanesan RTTL nian, tanba ida ne'e mak ami protesta ba GMN, podia atribui ba ita-nia televizaun públika”, dehan nia liuhusi Konferénsia Imprensa iha Salaun Luz Clarita, Bairu Formoza, segunda (07/03).

Tanba liga mós ba kustu ne'ebé mak sei hala'o iha televizaun públika RTTL nia kustu ki’ik liu, e osan sei fila ba kofre Estadu, duke kontrata ho GMN ne'ebé kustu boot liu, e kobertura ladun maka’as.

“Povu balun ne'ebé iha foho ne'ebá ne'e, sira laiha antena parabola, sira difísil atu asesu ba debate ne'ebé sei hala'o iha loron 15 mai ne'e. Agora ita hakarak debate kandidatu ne'e povu hothtou bele asesu para sira iha informasaun sufisiente ba programa sira ne'ebé kandidatu sira sei hato'o ida ne'e, ami hato'o ona ba CNE, espere katak bele iha resposta tempu badak”, afirma nia.

Ba kestaun ne’e Prezidente Komisaun Nasionál ba Eleisuan sira (CNE), José Agostinho Belo hatete, CNE hili Grupu Media Nasionál Televizaun (GMN-TV) tanba buat ne'e kuatasaun no haree ba televizaun ne'ebé kualidade di'ak.

“Ne'e la'ós polítika, ne'e prosedur administrasaun, sé mak manán, la manán ne'e kuatasaun, agora nusá mak nia ba kestiona fali, ida ne'e tékniku sira mak hatene, nia la manán meman ninia kualidade buat sira ne'ebé la bele, ne'e atu fó manán hanusa, tolu kedas se mak di'ak manán", dehan nia liuhusi liuhus telemovel hodi resposta ba Preokupasaun Ekipa Susesu Lú Olo, segunda (07/03).

 Kuatasaun ne'e CNE halo ba telvizasaun tolu, RTTL,EP GMN ho TVE no prosedur liuhusi administrativu CNE nian, ne’ebé konsege define hodi hili GMN atu sai responsável ba debate Kandidatu PR, iha loron 15 fulan-marsu 2022. (*)