“Ķarik fó fiar sai Prezidente garante fó espasu livre ba juventude hodi espresa sira-nia talent”, dehan Lamukan hafoin hala'o nia kampaña ho tipu diálogu iha Munisípiu Vikeke, domingu (07/03).

Tanba, asuntu juventude mós importante tebes ba dezenvolvimentu rai ida ne'e, liuhusi promove múzika, liliu fó espasu ba joven sira ne'ebé mak gosta múzika halo banda hodi kanta no aprezenta.

Ho ida ne'e, sei aplika programa ida ne'e, bainhira eleitu ba Prezidente Repúblika, tanba juventude nu’udar xave ba unidade nasionál no dezenvolvimentu.

Dala barak, esperiénsia hatudu ona, wainhira iha seremónia boot ida sempre bolu artista sira husi Indonézia mak mai kanta no juventude timoroan mak sai fali penonton iha rai ida ne’e.

Maske agora dadauk líder boot sira mós dehan mean baku fila, nomós mutin baku fila. Maibé nu’udar kandidatu independente hakarak fó hatene ba juventude katak, demokrasia eleisaun jerál, atu parlamentu ka prezidensiál la'ós atu hamosu futu manu, maibé halo politika ba rai ida ne'e.

“La'ós futu manu, ita ba manu futu ne’e tenke fiar katak fila ho manu futu, maibé politika Timor la’ós hanesan ne’e”, dehan nia.

Tanba ne'e, eleitu ba Prezidente Repúblika sei rekomenda ba Governu, atu eleva Sekretáriu Estadu Juventude no Desportu sai Ministériu, nune’e bele aloka orsamentu ne’ebé sufisiente ba juventude sira. (*)