“Ekipa Susesu Apoiu Kandidatura José Ramos Horta análiza ho klean, katak diskursu polítíku sein fundamentu ne’ebé Mari Alkatiri uza hodi atake Maun Boot Kay Rala Xanana Gusmão ho kandidatu Prezidente Repúblika Ramos Horta, nu’udar instrumentu politíku baratu atu fakar rai rahun ba povu eleitoradu nia matan, liuhusi utilizasaun ba situasaun sira liuba, ne’ebé laiha importánsia ho koneksaun ba situasaun atual”, dehan Portavóz Ekipa Susesu, Tomas do Rosário Cabral, liuhusi konferénsia imprensa iha Hudi Laran, domingu (06/03).
Tanba iha deklarasaun Sekretáriu Jerál Partidu FRETILIN, Marí Alkatiri katak, Xanana uluk sai Prezidente Repúblika, durante tinan lima ne'e ilegál, tanba eleisaun la tuir lei no konstituisaun maibé partidu FRETILIN tolera, nomós eis prezidente José Ramos Horta sai PR hahú ho ilegalidade tanba entrega Governu ba Xanana iha 2007.
Alkatiri mós dehan tán, iha 1975 mós Komité Sentral koko hasai Ramos Horta maibé nia (Mari Alkatiri) mak vota kontra dehan la konkorda, no mai fali iha fulan-marsu tinan 1977 mós FRETILIN kontinua koko hasai Ramos Horta, maibé Mari la konkorda. Nunr'e Ramos Horta louriadu Premiu da Paz maibé sai bornal ba Kay Rala Xanana Gusmão, dignidade tau iha ne’ebé; no eskola lakleur tun sa'e hakfodak serjana ona.
Ba dekarasaun ida ne'e, ekipa susesu kandidatu Ramos Horta konsidera argumentu no polítika ida ne'e sai hanesan objetivu ida atu subar de'it realidade dezastroza prezente ba povu no nasaun.
Tanba faktu komprovativu ne'ebé hatudu momoos ona iha 4 abril 2022, mosu kalamidade públika ka dezastre naturál maske Mari Alkatiri ho Partidu FRETILIN tonka hela Governu daualu no aprova Orsamentu Jerál Estadu kada tinan ho valór boot kompara ho OJE desde 2016, maibé realidade povu kontinua halerik, terus no ki'ak rabat rai.
“Iha situasaun ne'e aumenta drastikamente númeru kiak foun iha ita-nia rain, ekonomia nasionál parada no estagnada ho dekrésimu negativu tebes, iha valor porsentuais -8,6% iha tinan 2020; jovens barak laiha servisu, kompaña barak mak taka tanba atividade ekonómika la la'o, infraestratura estragada durante inundasaun to’o ohin loron seidauk iha reabitasaun”, dehan nia.
Tanba ne'e, Ekipa Apoiu Kandidatura José Ramos Horta deskorda ho deklarasaun Mari Alkatiri nian ne’ebé hatete, “Ramos-Horta sai Prezidente Repúblika hahú ho ilegalidade tanba entrega Governu ba Xanana iha 2007”. (*)
