"Pontu importante nia laran mak hanesan ohin ha'u dehan iha relatóriu nia laran deskreve labarik sira-nian dehan katak 48 pursentu labarik husi totál iha populasaun iha Timor sei moris iha mánutrisaun iha kiak nia laran ida ne'e sai evidénsia”, dehan Dinorah Granadeiru ba jornalista sira iha Salaun Ministériu Finansas, Aitarak Laran, tersa (24/05).

Ho nune'e sira buka hela mekanizmu saida hodi hadi’a labarik sira husi ki’ak ba mánutrisaun, no programa saida mak estadu tenke kria ho oinsá atubele redúz.

"Tanba atu halakon diretamente ha'u hanoin ne'e difísil ita estadu no nasaun foun ita iha situasaun ne'ebé mak barak maibé oinsá mak estadu bele iha inisiativa atu redúz situasaun ida ne'e”, afirma nia.

Tanba ne'e, INDICCA dadaun ne'e halo desiminasaun ba liña Ministeriál sira liliu iha diresaun Planementu tanba diresaun ne'e mak sai hanesan xave hodi halo oinsá haree ba problema labarik sira ne'ebé mak hasoru dadaun iha nasaun ida ne'e.

"Ita-nia tarjetu oinsá mak sira bele iha koñesimentu kona-ba relatóriu ne'e rasik no uza relatóriu ida ne'e sai referénsia hodi nune'e kada tinan rezolve sira-nia planu no sira-nia orsamentu”, hatete nia.

Nune'e kada liña Ministériál sira bele hatene hodi koloka orsamentu tuir persentajen sira oinsá atu hasa'e labarik sira husi moris kiak nia laran sira.

"Persentajen hirak mak sira aloka ba labarik, persentajen hira mak sirs tenke halo planu hadi’a situasaun sira ne'e”, esplika nia.

Diretór Jerál Estatistika Nasionál, Elias dos Santos Ferreira hatete, antes ne'e, Primeiru Ministru (PM), Taur Matan Ruak hatete ona katak tenke tau atensaun ba labarik sira iha Timor-Leste.

"Semana kotuk ne'e ita primeiru Ministru mós ko'alia katak presiza tau ita-nia atensaun ba labarik”, dehan nia.

Tanba labarik sira ne'e la'ós ema seluk nia oan maibé nu'udar jerasaun Timor nian ne'ebé presiza tau importánsia no presiza ajuda sira.

Dadaun ne'e INDICCA serbisu hamutuk ho parseiru dezenvolvimentu Nasionál no internasionál sira oinsá atu haree ba problema labarik nian iha setór sira mak hanesan, nutrisaun, saneamentu, ijiene oinsá halo prevensaun no protesaun sira. (*)