Diretór Ezekutivu Sames, Santana Martins hatete, kooperasaun ne’ebé halo atu fasilita estudante sira halo pratika farmasia nian iha SAMES.
“Ohin selebra fali akordu tékniku hodi servisu hamutuk entre SAMES ho Instituto Ciênsia Saúde (ICS) ne'ebé mak atu apoiu kona-ba estajiu estudante sira husi departamentu farmasia ninian, sira hala'o estajiu ne'e iha fulan rua nia laran”, dehan Santana iha Salaun SAMES, Kampo Alor, sesta (22/04).
Entudante sira ne'e atu aprende iha área farmasia nian, hahú husi prosesu aprovizionamentu nian, resepsaun no inspensaun armajenamentu no distribuisaun, iha pontu hirak ne'e mak sei aprende durante fulan rua nia laran.
“Depois sira mós sei halo rotativu ba armajen sentral nomós iha armajen rejionál Ainaro ho Baukau”, esplika nia.
Iha akordu ne'e mós mensiona kona-ba responsabilidade saida mak SAMES tenke fó, liliu indika pesoál kliníka sira atubele akompaña estudante estajiáriu sira durante sira-nia estajiu.
Reitór ICS, Domingos Soares hatete, estudante sira ne'ebé hala'o sira-nia estajiu iha SAMES hamutuk 68, durante fulan rua nia laran.
“Estudante sira ne'e hala'o sira-nia teoria iha universidade remata ona, entaun sira presiza mai estajiu iha SAMES hodi halo prátika ho teoria sira ne'ebé mak aprende ne'e mai halo prátika ne'e atu haree kona-ba ninia rezultadu”, dehan nia.
Estudantes sira sei hala'o estajiu durante fulan rua iha Same, depois iha fulan ida sei ba tan halo prátika iha apotik sira ne’ebé identifika ona.
“Ami hili armajen SAMES ne'e tanba SAMES mak sai sentru ida toma konta kona-ba ai-moruk, no ami agradese ba instituisaun ida ne'e nia diresaun tanba simu ami dala barak ona, depois apotik sira mós ami sei ba halo koordena ho sira para bele simu estudante sira nee hala'o estajiu iha ne'e ba”, esplika nia. (*)
