Portavóz Komandu Jerál PNTL, Superintendente Xefe Armando Monteiro hatete, kazu hatama karreta aat husi nasaun Austrália mai Timor-Leste ho ai-moruk ilegál iha (SAMES) parte SIKN konklui ona prosesu invetigasaun no submete ba Ministériu Públiku hodi aprezenta ba Tribunál atu foti desizaun.
“Kazu Portu Dili, ita rejista kazu rua, kazu ai-moruk, tantu mós kazu karreta aat husi kazu rua ne’e, ita finaliza ona prosesu investigasaun, no aprezenta ona ba Ministériu Públiku mak hanesan nain ba desizaun iha tribunal”, dehan Armando, iha Kuartel Jerál PNTL Kaikoli, segunda (20/06).
Tanba ne’e, kazu importasaun karreta at husi nasaun Austrália tama iha Portu Dili, kuarta (08/06), Nune’e foti ona medida apreensaun hodi dada fita polísia nian ka (Police Line) ba karreta aat hamutuk 131 ne’ebé estasiona hela iha Portu Dili.
Iha dekretu-lei númeru 30/2022, loron 20, fulan-juñu, hatete karreta ne'ebé importadu ninia kondisaun tenke seguru ba ema nia vida, maibé, realidade hatudu katak, karreta 131 importa husi Austrália ne’e kondisaun aat hotu no la seguru ba ema nia vida.
Haree ba baze legál ne’e, PNTL liuhusi unidade SIKN, hola medida polisiál, halo kedas apreensaun, dada fita polísia, kontinua halo prosesu investigasaun kriminál, tuir lei ne’ebé vigora iha Timor-Leste.
Kona-ba asuntu krime nian ba kazu ne’e, parte Ministériu Saúde entrega de’it ba Servisu Investigasaun Kriminál Nasionál mak haree no responsábiliza ba lala’ok sira krime nian hodi halo invetigasaun.
“Ita finaliza tiha ona nia prosesu, ita hein delegasaun tuir kompeténsia Ministériu Públiku, sé enkuantu filafali mai, PNTL ka ba fali instituisaun seluk, para ita kompleta malu, prodúz regra oinsá atubele aprezenta ba Ministériu Públiku”, afirma nia.
Antes ne’e, ofisiál ba Clearance iha Diresaun Nasionál Farmásia no Medikamentu iha Ministériu Saúde (SAMES), Octávio Fernandes hatete, ai-moruk sira ne’e, kompaña sosa iha nasaun India, mak hatama mai Timor-Leste.
“Sira atu prosesu clearance ba sira-nian ai-moruk sira ne’ebé mak sira hatama husi India mai, maibé, to’o iha ne’e, ita haree didi’ak, item lima ne’ebé mak Ministériu Saúde, husi diresaun nasionál SAMES halo clearance ne’e, ami nota katak, sasán ne’e nia fizikamente iha SAMES laiha, tanba ne’e maka, ami mai ne’e verifika didi’ak, para oras ida ami sei halo relatóriu ba ami-nia superiór sira”, dehan nia.
Kona-ba, iha informasaun katak, ema ka kompaña ne’ebé hatama ai-moruk sira ne’e, falsifika dokumentu, sei halo verifikasaun ba dokumentu sira ojiniál, maibe tuir kontratu ne’ebé Ministériu Saúde kontrata ho kompaña katak, kompaña bele hatama deit ai-moruk sira ho item hamutuk 5, maibé, tipu ai-moruk sira ne’e, ekipa sei halo identifikasaun.
“Sé kuandu laiha, automatikamente, sira falsifika hotu dokumentu sira ne’ebé mak sira haruka ba Ministériu Saúde, ai-moruk sira ne’ebé mak sira hatama liu mai ne’e, la tuir hotu ida ne’ebé mak ami aprova, ami autoriza”, afirma nia.
Entretantu kazu importasaun ai-moruk ilegál, akontese iha loron 13 juñu 2022, iha tempu kalan, SIKN deteta kompaña importadór ne’ebé durante importa ai-moruk mai SAMES, la tuir kontratu ka akordu ne’ebé halo ho Governu, liuhusi Ministériu Saúde deside ona.
Kompaña importadór ba ai-moruk ne’e ho naran Importadór Moris Foun, no nain ba kompaña ne’e, sidadaun estranjeiru ida husi nasaun Indonézia, maibé durante hela iha Timor-Leste, na’in ba kompaña ne’e, loke mós klínika privádu ida, ho naran Klínika Moris Foun.
Tuir kontratu ne’ebé kompaña ne’e halo ho Ministériu Saúde katak, item ai-moruk neebé atu hatama mai armajen SAMES, iha item ai-moruk hamutuk lima (5), ne’ebé hatama ho legalmente hanesan, Amoxicillin and Clavulanate Potasium ho doze 625 mg, Azithromicin doze 500 mg, Mefenamic Acid & Dicyclomic Hydrochloride iha doze 250 mg, 10 mg, Paracetamol iha doze 125 mg/5ml, Aluminium Hidroxide, no ho Magnesium Hidroxide, Shimeticone Aktif, doze 200 mg + 200 mg + 25 mg/5ml.
Maibé, infelizmente, ai-moruk sira ne’ebé kompaña importadór ne’e hatama mai SAMES, inklui mós ai-moruk sira seluk tán, ne’ebé mak ho kuantidade item hamutuk 12 mak hanesan, Metronidazole 500 MG Tablet (Metrozar 500), Griseofulvine 500 MG Tablet, Hyosine Butilbromide 10 MG Tablet, Finasteride 5 MG Tablet (Finacent), Amoxicluv 625 MG Tablet (Clamoxar 625), Abroxol 625 Sirup (Ambroxar), IV Cannula 16 G, IV Cannula 18 G, IV Cannula 20 G, IV Cannula 22 G, IV Cannula 24 G, Umbelical Clamp.
Bazeia ba faktu sira ne’e hotu mak, Komandu PNTL, husi SIKN tun direta ba SAMES hodi hala’o identifika no halo investigasaun foti medida sira polísial nian tuir lei ne’ebé mak vigóra iha Timor-Leste.
PNTL dadaun ne’e finalize ona prosesu invetigasaun no aprezenta hotu ona ba Ministériu Públiku (MP) hodi kontinua prosesu ba Tribunál atu foti desizaun. (*)
