“Ha'u mai iha-ne'e nu’udar sidadaun ida, nu’udar Xefe Estadu, tenke buka aprende. Ha’u mai haree kondisaun ne'ebé funsiona e buat ne'ebé ha’u rona pelumenus superfisialmente bele hatete, haree hanesan organizadu, sistema bee monta iha tinan sira-nia laran ne'e”, dehan Horta hafoin halo vizita Kortezia ba Armajen SAMES iha Kampu Alor, segunda (01/08).

Tanba uluk iha tempu UNTAET ne'e, mesak ema Estranjeiru mák jere maibé ohin loron timoroan de'it mak jere no okupa iha SAMES.

Ba atividade Prezidente Repúblika  mós la'ós mai de'it iha SMAE maibé mós sempre buka rona kada Ministériu sira, inklui Primeiru Ministru, hodi bele akompaña no situasaun jerál Timor-Leste nian.

Durante iha atividade vizita refere, Xefe Estadu haree situasaun jerál iha SAMES organizadu tanba sistema ne’ebé estabelese no jestaun ba medikamentu 100% husi Timoroan sira kompara ho iha tinan barak liuba iha tempu UNTAET nian.

“Sistema ne’ebé monta tinan sira-nia laran la’ós agora de’it buat ne’e la’o nene’ik desde tempu UNTAET to’o agora hothotu manán esperiénsia no balun iha estudu ne’ebé própriu ba ida-ne’e, tanba timoroan kuaze 100% mak iha ne’e, uluk la’e. Purtantu, uluk tempu UNTAET nian UNTAET mak kaer, depois indepedénsia mós sei iha ema maibé agora ita haree 100% médiku no farmatiuka no ema sira halo jestaun parte Timoroan de’it”, esplika nia.

Tanba ne’e, ba oin tenke buka halo di’ak liután funsionamentu SAMES.IP no Prezidente Repúbklika mós sei esforsu makaas atubele fó apoiu hodi ko’alia ho Governu bele tau prioridade hodi hadi’a infraestrutura iha SAMES liliu armazenamentu ba medikamentu.

Kona-ba inundasaun ne'ebé kada tinan mosu iha edifísiu SAMES ne'e dadaun Governu iha ona planu, no sira halo tiha ona prevensaun ho moru atu nune'e inundasaun ruma mai tan sei kontrola di’ak liu.

Nune'e tinan 2023 sei iha mós diskusaun Orsamentu Jerál Estadu iha Parlamentu Nasionál no bainhira ida-ne'e aprova no promulga mak Governu sei bele halo infraestrutura foun ne’ebé adekuadu ba SAMES.

"Bom iha ona planu no sira rasik foin dadauk hatete sai, inundasaun mai, mais sira mós halo tiha ona prevensaun halo moru para inundasaun ruma mai tan karik sei kontrola di'ak liu tanba halo ona moru bo'ot ne'e”, katak nia. (*)