Projetu Dekretu-Lei rua, ne’ebé aprova kona-ba kriasaun Institutu Nasionál Farmásia no Produtu Médiku (FPM) no Rejime Asisténsia Médika iha Rai-li’ur, aprezenta aprezenta husi Ministra Saúde, Elia A. A. dos Reis Amaral, iha sorumutuk Konsellu Ministrus iha Palásiu Governu, tersa (29/08/2023).
FPM ne’ebé kria ninia sede iha Munisípiu Dili ho ninia jurisdisaun iha territóriu nasionál tomak. Nune’e FPM, troka Servisu Autónomu Medikamentu no Ekipamentu Saúde, I.P, nu’udár institutu públiku ida-ne’ebé responsavel ba fornesimentu produtu farmaséutiku no ekipamentu médiku sira Servisu Nasionál Saúde nian.
Tanba ne’e, FPM bele hetan produtu farmaséutika no ekipamentu médiku sira, hanesan liuhusi importasaun, prodúz produtu farmaséutika no ekipamentu médiku sira, asegura kontrolu kualidade ba sasán sira ne’ebé hetan ona ka prodúz husi institutu no asegura prátika di’ak armazenamentu no distribuisaun ba Servisu Nasionál Saúde nian, no fan filafali ba farmaséutika no unidade privada saúde nasionál sira, bainhira presiza.
Ba aprovasaun Rejime Asisténsia Médika iha Rai-li’ur ne’e, ho objetivu atu adapta Rejime Asisténsia Médika iha Rai-li’ur ba realidade atuál país nian, nune’e mós prátika vijente/atuál sira. Tanba ne’e, klarifika no armoniza konseitu sira ho prátika lejizlativa atuál sira, esklarese no redús liña atuasaun husi interveniente oioin iha prosedimentu asisténsia médika iha rai-li’ur, no evita redundánsia no atus la nesesáriu sira hodi asegura asisténsia médika ida-ne’ebé lais no efikás liu.
Diploma ne’e prevee, direitu asisténsia médika iha rai-li’ur ba benefisiáriu sira Servisu Nasionál Saúde nian ne’ebé hela iha Timor-Leste, nomós abranje situasaun sira, iha ne’ebé benefisiáriu temporariamente iha rai-li’ur, uainhira hala’o hela servisu Estadu no presiza asisténsia médika urjente no inkompativel ho demora hodi fila mai Timor-Leste.
Tanba konsagra ona katak pasiénte ne’e bele benefisia de’it asisténsia médika iha rai-li’ur karik akompaña husi médiku iha Servisu Nasionál Saúde nian, no la posivel atu halo proposta asisténsia médika iha rai-li’ur ne’ebé mai husi instituisaun ne’ebé la integra iha Servisu Nasionál Saúde. (*)
