“Enkontru ne'e atu halibur fali dirijente sira ne'ebé mak durante ne'e halo implementasaun ba programa lian kontra violensia ba labarik no feto ne'ebé akontese iha munisípiu haat. nomeadamente, munisípiu Dili, Ermera, Vikeké no Bobonaro”, hatete nia iha Edifísiu Asosiasaun Hak, Farol, sesta (25/03).
Ba projetu ne'ebé UNETL hala'o hetan apoiu orsamentu husi UN-WOMEN atubele implementa iha munisípiu 4, ho duransaun tinan ida, fulan-tolu.
Tanba ne'e, UNETL halibur filafali direjente sira husi munisípiu haat, atu hamutuk halo filafali avaliasaun, nomós produz dokumentu kona-ba lian kontra violénsia ne'ebé UNETL mak sai hanesan na'in atubele públika.
“Ami hanoin importante tebtebes atubele rona durante saida mak akontese iha munisípiu haat”, hatete nia.
Iha prpgrama lian kontra violénsia ne'ebé sira halo, tarjetu uluk munisípiu haat, inklui mós prepara ba formadór sira ne'ebé bolu hanaran TOT (Training of Trainers).
“Depois sira hetan tiha formasaun, sira kontinua fó formasaun ba joven sira iha eskola sekundária, nomós joven sira husi komunidade”, hatete nia.
Iha enkontru avaliasaun ne'e, UNETL mós konvida parseiru importante sira, unidade ba ema kbi’it la’ek, PRADET, Fokupers, AJAR, Plan Internasional, no varius organizasaun sira, ko'alia kona-ba kna'ar ne'ebé mak sira halo ligadu ho prevensaun violénsia hasoru feto no labarik.
Nune'e bele fasilita no fó informasaun ba dirijente sira ne'ebé mak hetan ona formasaun, atubele iha informasaun ne'ebé sufisiente hodi aplika prevensaun, no halo advokasia ka protesaun ba labarik ho feto sira.
Tanba hanesan públiku tomak haree no violénsia ne'e sai iha televizaun, iha mídia sosiál, iha ne'ebé feto barak mak sai vítima inklui mane no labarik ki’ik.
"Ohin (25/03) sira mai atubele hatene, karik ha’u iha kazu hanesan ne'e, ha'u atu lori ba ne'ebé, hau atu kontaktu sé, e oinsá atu prosesa kazu sira ne'e, e ha’u hanoin ida ne'e mak prosesu sira ne'ebe karik sira rede referal nian mak ida ne'ebé, karik akontese iha munisípiu sira karik sira atu kontaktu se uluk”, esplika nia. (*)
