Tempotimor (Dili)-Adjunta Prokuradora-Jerál Repúblika, Remizia de Fátima hatete, Ministériu Públiku (MP) haruka ona kazu, Francisco Kalbuadi Lay ba Tribunál no hein dezignasaun ba julgamentu iha Tribunál Distritál Dili.

“Kona-ba kazu señor Kalbuadi nian, ne'ebé señor ne'e agora fila mai iha Timor e depois ami notifika ona, prosesu agora haruka ba Tribunál e hodi hein designazaun ba julgamentu karik husi tribunál ninian, tanba prosesu ami remete tiha hotu ona ba tribunál”, dehan nia hafoin hasoru malu ho Prezidente Repúblika, Francisco Guterres ‘Lú Olo’, iha Palasíu Prezidensiál Bairopite, segunda (28/03).

Nune'e Prezidente Repúblika Lú Olo hatete, prosesu kazu Kalbuadi entrega ba Tribunál hodi halo julgamentu, wainhira sala tenke asume responsabilidade ne'ebé iha.

“Ha'u hanoin hanesan baibain Prezidente ida ne'e prosesu ne'ebé mak la'o e depois entrega ba Tribunál wainhira julgamentu ita haree, karik nia sala tenke asume responsabilidade ne'ebé nia iha, se nia la sala entaun konforme deside tuir lei, ha'u hanoin ida ne'e mak nia fó hanoin”, haktuir nia.

Relasiona ho kazu ne'ebé Kalbuadi depois mak sei rona husi Tribunál Rekursu, maibé prosesu sira ne’e entrega hotu ona ba Tribubnál atu deside hodi halo julgamentu.

“Ha'u hanoin ida ne'e mak orsida rona husi tribunál tanba prosesu ne'e ami foin remeta ba iha Tribunál wainhira nia fila mai, ami notifika nia iha loron ne'ebá e ami remete kedas ba tribunál, tanba akuzasaun preparadu tiha ona, tanba nia ba liur depois nia mai ami notifika, ami notifika e haruka tiha ona ba tribunál, taun ita hein de'it desizaun Tribunál ninian wainhira mak atu deside julgamentu”, esplika nia.

Prezidente Tribunál Rekursu, Deolindo dos Santos hatutan, kazu ida ne'e seidauk bele dehan ba públiku tanba sei iha primeira instánsia seidauk to'o Tribunál Rekursu.

“Ida ne'e  ha'u seidauk hatete ba ita-boot sira, tanba buat ne'e iha primeira instánsia, see akuzasaun tama karik, nia iha primeira distánsia, ne’e so tribunál primeira instánsia sira mak hatene, juiz ida prosesu iha ne'e, presiza tama tribunál karik, juiz ida kaer prosesu ne'e depois nia mak marka loron julgamentu, depois bainhira to'o tempu mak nia bele ba to'o Tribunál Rekursu, mais primeiru ne'e sei iha tribunál Dili, se kazu tama ona karik, ne'ebé nein konsellu, nein Prezidente atu ba hatete ba juiz o marka loron hanesan ne'e ona ga?. Ne'e la bele, tanba ne'e independente kada juiz ida ninian ne'ebé mak kaer prosesu ne'e rasik”, informa Deolindo.

Maske ida ne'e preokupasaun ema hotu nian, maibé Prezidente Tribunál Rekursu, Deolindu dehan kazu ne’e husik ba la'o tuir nia forma rasik ne’ebé tuir lei hatete.

“Ha'u fiar katak ne'e preokupasaun públiku nian, mais depois ita husik buat ne'e la'o ho nia forma rasik ne'ebé ke tuir lei hatete, depois ita to'o iha ne'ebá ita sei hatene desizaun ne'e halo nusá”, deklara nia. (*)