“Ami sei notifika ka fó samada ba meiu komunikasaun sosiál no jornalista sira ne'ebé komete infrasaun tanba ne'e, sei fó sansaun forte ba jornalista no meiu komunikasaun sosiál sira ne'ebé komete infrasaun “grave” hasoru Kódigu Etika Jornalistika, Lei Komunikasaun sosisál, Matadalan Reportajen Eleitorál no Matadalan Mídia Sosiál ba Jornalizmu”, dehan Prezidente Interinu Konsellu Imprensa (KI), Expedito Dias Ximenes, iha salaun KI, Kintal Boot, sesta (25/03).
Iha kompaña nia laran, Konsellu Imprensa identifika Jornálista balu halo promosaun ba kandidatu Prezidente Repúblika sira hodi fahe informasaun matéria kampaña polítika nian.
“Durante Konsellu Imprensa halo monitorizasaun, mós indentifika jornalista balu halo promosaun ba kandidatu sira liuhusi fahe-tutan informasaun no materia sira kampaña politika nian na halo komentáriu ne'ebé ho tendénsia fó apoiu ba kandidatu hira ne'e iha sira-nia konta mídia sosiál (facebook)”, deklaera nia.
Tanba ne'e, rezultadu monitorizasaun no analiza husi Konsellu Imprensa hola nia pozisaun no foti asaun hodi fó sasaun katak Jornálista balu kontra kódigu etika Jornálista no komete infrasaun.
Nune’e sei mantein komunikasaun ho redasaun meiu komunikasaun sosiál sira atu asegura ninia jornalista hodi nafatin kumpri auto-regulasaun sira hanesan, Kódigu Etika Jornalitika, Matadalan Reportajen Eleitorál no Matadalan Mídia Sosiál ba Jornalizmu iha períodu Segunda ronde eleisaun prezidensal.
Diretór Ezekutivu Konsellu Imprensa (KI) Timor-Leste, Rigoberto Monteiro hatete, jornalista sira ka meiu komunikasaun sosiál sira mak halo infrasaun grave iha kódiku etika jornalizmu nian no lei komunisaun sosiál mak KI sei fó sansaun administrativa no selu koima.
“Mais importante liu, ita iha sansaun rua tuir loloos lei, primeru sansaun administrativa, KI ita iha prosesu prosedimentu iha atu uza, segundu mak uza sansaun koima maibé to'o agora ita seidauk aplika koima tanba nia prinsípiu dekreitu lei kona-ba koima seidauk kalaru, entaun saida mak KI iha kompeténsia atu foti mak fó sansaun administrativa kuandu nia halo infrasaun grave ba kódiku etika, lei komunikasaun sosiál, ne'e ita-nia kompeténsia ne'e, sei to'o iha sansaun administrativa, ida ne'e mak ita bele foti”, esplika nia. (*)