Portavos Gaspar Tali Besi katak, tuir loloos orsamentu hirak ne'e prevé ba setór importante sira hanesan bee-moos, edukasaun, seguransa, agrikultura hodi fó benefísiu ba povu ki'ik sira , maibé parlamentu nasionál hakarak hola fali kareta. Tanba ne'e, Prezidente Republika tenke veta lei orsamentu ne'ebé aloka ba sosa kareta foun ba deputadu sira no realokasaun ba fali ba seitor importante sira.
“Ami husu ba Parlamentu Nasionál atu hapara sosa kareta hamutuk 30 ho marka Pajero Sport, tanba tempu la opurtunu no husu ba Prezidente Republika atu veta lei orsamentu ne’e hodi muda fali ba setór importante para util no benefísia ba povu ki’ik sira, tanba povu kontinua halerik ba bee-moos, eduksaun, seguransa, agrikultura no seluk tan," Dehan Portavós Tali Besi liuhusi konferensia imprensa iha Asosiasaun HAK Farol, Kuarta (5/10).
Portavós ne’e mós akresenta, orsamentu ne’ebé prevé hodi sosa kereta ne’e bele realoka ba prgrama importante sira hanesan vítima inundasaun sira ne'ebé desde loron 4 fulan abril 2021 to’o ohin loron seidauk hetan apoiu rekoperasaun husi estadu.
Nia mós husu ba povu tomak atu neon na'in ho labele hili tan partidu ka deputadu sira ne’ebé aprova de’it osan sira-nia interese.
“Husu ba entidade hotu atu ijize hodi hapara aktu ida ne’e, tanba sei hamosu de’it polítika esbanzamentu no halo tusan ba ita-nia jerasaun iha futuru, ami konsidera politika ne’e nu’udar leilaun ba povu nia osan”, tenik nia.
Iha fatin hanesan, koordenadór Asean Justice And Rigth (AJAR), Inocencio Xavier hatete, Parlamentu Nasionál nu’udar orgaun ne’ebé reprezentante povu, tuir loloos tau matan no trata asuntu importante ba povu Timor-Leste tomak, liu-liu aimoruk ne’ebé iha ospitál referal baukau no sentru saúde sira iha Díli laran kuaze stock hotu.
"Parlamentu Nasionál tenke halo ezersísiu ida hodi ajuda para fó melloramentu ba setór saúde públiku, tanba polítika sosa kareta la’ós urjente, maibé urjente mak aimoruk ne’ebé laiha ba ospitais liuliu ba ospitál referál baukau no sentru saúde sira iha Díli laran kuaze stock hotu.(*)