“Ami husi estudante ativista Eskola diretu Umanu AJAR lamenta tebes ho desizaun husi Tribunál ne'ebé aplika medida kuasaun TIR-AP ba arguidu na'in-9. Ami konsidera la adekuadu tanba desizaun ne'e bele fó fatin ba arguidu sira kontinua konsumu droga”, dehan Portavoz Estudante Atevista Diretu Umanu husi AJAR, Ivonia da Cruz liuhusi Konferénsia Imprensa iha Faról, sesta (19/08).

Ba kestaun ne'e husu ba Parlamentu Nasionál nu'udar orgaun soberanu ne'ebé iha kompeténsia ba lejisladór atu halo harmonia no alterasaun ba lei númeru 2/2017 hodi fó medida ne'ebé rigor, forte no seriu atu evita atividade tranzisaun ilísitu droga iha Timor-Leste.

Tanba husi estudante ativista Eskola diretu Umanu AJAR haree Tribunál aplika medida kuasaun Termu Identidade Rejidénsia (TIR) no aprezentasaun periodika (AP) ba arguidu na'in-9 ne'ebé deskonfia komete kazu droga tanba ho razaun katak arguidu hirak ne'e konsumu de'it la'ós trafikante ne'ebé atividade ilísitu ba droga.

Maibé faktu ne'ebé akontese no hatudu katak arguidu sira sosa no konsumu aimoruk droga ne'e ho sira-nia vontade no hakarak rasik no uza sira-nia osan rasik mak sosa, sein obrigasaun husi ema ruma ka parte ruma.

Nune'e mós bainhira autoridade sira kaptura arguidu na'in-9 ne'e mós rai iha rejidénsia ne'ebé diferente, ida-ne'e hatudu sira prátika duni aktu ilísitu ba droga ne'ebé lei númeru 2/2017 bandu.

Tanba ne'e Pozisaun Estudante Ativista Duretu Umanu sente lamenta tanba bazeia ba evidénsia sira-ne’e, tuir loloos Tribunál aplika mak artigu 7 husi lei númeru 2/2017 hodi fó medida kuasaun prizaun preventiva ba arguidu sira nomós konsidera sira nu’udar tráfiku atividade ilísitu droga.

Nune’e iha artigu 7 ne'e rasik kondena mós ema sira-ne'ebé halo autorizasaun sosa droga refere.

“Ami la konkorda ho pozisaun sira ne'ebé dehan katak arguidu sira-ne'e nu’udar vítima, ami triste no preokupa ho desizaun Tribunál ne'ebé aplika de’it artigu 12 husi lei númeru 2/2017 ba arguidu sira hodi fó medida kuasaun TIR-AP”, deklara nia. (*)