Xefe Departementu IADE Baukau, Luíza Carlos de Almeida hatete, maske durante pandemia covid-19 fó impaktu ba aktividade, maibé nafatin realiza aktividade prinsipal sira hanesan kapasitasaun mikro ki'ik no médiu ba emprezariu sira iha Munisípiu Baukau.
"Totál ba treinamentu ne'e, iha klase 5, hanesan modul agro negósiu, totál partisipante ba treinamentu ne'e hamutuk ema na'in-50 resin, iha treinamentu klase ida seluk kona-ba komesa ita nia negósiu, kona-ba Fasilidade Inkuvasaun Negósiu (FIN), bisnis ne'ebé mak foun, ita bolu inovasaun," dehan Luiza iha kna'ar fatin vila nova Baukau, segunda (31/01).
Durante treinamentu hala’o iha Suku Gariuai Postu Baukau Vila, Suku Soba Postu Laga, Suku Ostiku Postu Vemase, inklui Suku Uailaha, Postu Venilale.
Liuhusi treinamentu mós ékipa sira identifika koiñesementu jovem sira nia kona-ba Fasilidade Inkuvasaun Negósiu (FIN) ou negósiu inovasaun sira, tanba barak iha potensialidade atu harii negósiu turizmu nian.
"Sira iha potensialidade, maibé menus kuinesementu, tanba ita nia joven iha triloka, ami haree iha oportunidade, tanba sira iha kuinesementu di'ak," nia afirma
Liuhusi identifikasaun, IADE haree ba grupu inovativu sira ne'ebé implementa buat foun, maibé laiha orsamentu, nune’e apoiu kliente sira ho orsamentu, tanba ho programa Fasilidade Inkuvasaun Negósiu (FIN).
"Ami apoiu liliu ita nia kliente sira iha Baukau, ita sujere ema na'in-2 ba asesu progrma FIN, ida mak produs kakau iha Uailili, asesu ba programa FIN sira hetan rihun US$11,500.00, ida tan hakiak manu lokál Buruma nia aprezenta, maibé nia tama ba faze tuir mai nia hetan rihun US$ 5.000 apoiu ba nia negósiu manu timor," nia konta
Tanba ne'e, enkoraja joven sira iha Munisípiu Baukau, ativu iha negósiu inovativu sira atu bele kria servisu ba ita nia aan rasik, tanba iha nasaun Timor-Leste joven sira ne'ebé remata estudu iha nivél universitáriu hasai ona lisensiatura, maibé laiha kampu servisu.
Enkuatu Ministéiru komersiu Asuntu Ekonomiku (MCAE-sigla portugues) aloka orsamentu ba IADE Baukau hodi apoiu ba kliente na'in-ida no na'in-ida seluk sei iha prosesu. (*)
