Tuir informasaun ne’ebé www.tempotimor.com asesu pájina MTCI katak, segundu faze ba Kompetisaun Negósiu Inovativu 2022 ho títulu “Promove Abilidade Ba Futuru: Hari’i no Haforsa Empreza Foin-Sa’e Sira Hodi Kontribui ba Dezenvolvimentu Ekonomia Sustentável” nu’udar programa dezenvolvimentu ekonomia ne’ebé parseria entre MTKI) ho PNUD.

Programa Kompetisaun Negósiu Inovativu ne'e sai hanesan programa daruak ne'ebé implementa husi MTKI parseria ho PNUD ho nia objetivu atu fó oportunidade ba foinsa'e sira hodi esplora sira-nia potentiál iha área setór negósiu produtivu sira (Industria, turizmu, komérsiu, agrikultura, kafé no peska, teknolojia no inovasaun ai-hán), hodi nune'e bele kontribui ba meta estadu nian ne’ebé mak atu haforsa ekonomia rai laran liuhusi hasa'e númeru auto-empregu foinsa'e husi setór Mikro Pekena Media Empreza iha Timor-Leste.

Ba kompetisaun ne’e iha kritéria rasik ne’ebé fó sai husi komisaun elijivel ba Joven kreativu feto, mane, defisiente no LGBTIQ+ne’ebé ho idade 18 to’o 35, Individu, Grupu Joven produtivu inklui Kooperativa ne’ebé lidera husi Joven, mai ho Idea negósiu inovativo iha seitor sira hanesan Agrikultura & Peskas, Indústria no komérsiu, Teknolojia no Inovasaun ai-hán no prioridade ba Joven sira husi área rurál ne’ebé iha Munisípiu 12 Inklui RAEOA.

Ba negósiu ne’ebé foin mak hahú ka Start-up no Ezistente la elijivel mak hanesan Empreza ne’ebé foin dadaun liu ona iha programa Kompetisaun Negósiu Inovativu MTCI 2021, Benefisiáriu husi programa UNDP-SEEWAY Project, Empreza sira ne’ebé asesu ona Kréditu Suave, Empreza ne’ebé mak hetan ona ajuda husi Organizasaun Naun Governamentál no Embaixada sira seluk.

Iha mos maneira ne’ebé utiliza hodi submete aplikasaun ba kompetisaun refere mak bele vizita situs https://forms.gle/pPyMeHYwqr7maj6a7

hodi priense no submete aplikasaun, bele hakat ba Direcção Nasional Apoio e Dezenvolvemento Micro, Pequenas e Media Empreza MTCI, UNDP Knua Juventude Fila-Liman no Centro Dezenvolvementu Emprezariál iha Munisípiu 12 inklui RAEOA. Bele mós vizita Pájina Facebook Ministério Turismo Comércio e Industria, Vice-Ministro Comercio e Industria Domingos Lopes Antunes, Knua Juventude Fila-Liman, UNDP Timor-Leste. (*)