Tempotimor (Lequidoe) – Sekretáriu Estadu Kooperativu (SEKoop), Arsenio Pereira da Silva promete ba komunidade kamponeza iha Postu Lequidoe, Suku Faturilau atu hola Bani-Been ne'ebé komunidade kamponeza Faturilau sira Koleta.
"Ha'u halo ona desizaun ba ha'u nia funsionáriu sira para oinsá sira halo nia fatin. Ha'u sei haruka ekipa husi SEKoop mai, para hola Bani-Been ne'e no dezeña nia fatin oinsá para Bani-Been ne'e labele husik de'it hanesan ne'e. Tenke halo ho nia fatin, para asesu ba merkadu ema bele asesu ho nia folin," dehan Arsenio iha Suku Faturilau, Kinta (22/08/19).
Governante ne'e subliña, SEKoop mós sei tau iha planu para lori produtór Bani-Been sira ba estuda iha nasaun seluk.
"Tau mós planu para tinan oin mai, sei haruka sira ne'ebé produz Bani-Been ba tuir formasaun iha rai liur. Liuliu oinsá para nia koleta ne'e no pos kolleta ne'e, para depois sira tenke tau iha fatin ne'ebé bele atrai ema atu sosa," dehan Arsenio.
Entretantu, koordenadór ba kamponeza Suku Faturilau, Zakarias da Costa sente kontente tanba SEKoop foti ona desizaun atu hola Bani-Been hirak ne'ebé grupu kamponeza produz.