Tempotimor (Lequidoe) – Sekretáriu Estadu Kooperativu (SEKoop), Arsenio Pereira da Silva, Kinta (22/08/19) hala'o kolleta ba rezultdu agrikultura ne'ebe komunidade kamponeza Suku Faturilau produz.
"Ha'u nia vizita ida ne'e, sira konvida liuhusi pedidu para mai ko'alia ho sira. Tanba, iha ne'e mós sira produz Bani-Been. Tanba Bani-Been ne'e mós tama iha programa Governu daualu nian liuliu iha SEKoop nian," hatete Arsenio iha suku Faturilau, Kinta (22/08/19).
Nia dehan, dezenvolvimentu ba kooperativa ne'e to'os-na'in mak bele halo dezenvolvimentu. "Iha kooperativa ne'e iha interligadu. Laiha ema ida mak hela iha kotuk, para ita bele livre moris hodi halo dezenvolvimentu. Tanba, dezenvolvimentu la'ós ukun na'in sira mak halo. Maibé, to'os-na'in sira mak halo," Arsenio afirma.
Sekretáriu estadu hatete komunidade nia produsaun sira ne'ebé iha, SEKoop sei tau iha planu ba tinan 2020. Liuliu produtu ne'ebé komunidade iha.
Ho prezensa husi SEKoop ne'e, komunidade sente kontente. Tanba, tinan barak ona Governante seidauk ba suku Faturilau. Maibé, iha VIII Governu SEKoop bele to'o iha Suku Faturilau, ne'ebé izoladu tebetebes.
Produtu lokál ne'ebé SEKoop koleta mak hanesan Aifarina, Talas, Hudi, Batar, Bani-Been, Fore Talin no Saburaka.