"Iha konkursu boot, ne'ebé mak dalaruma ami emprezáriu nasionál ladún asesu para ba tuir. Prinsipálmente, ita nia maun alin Xineza mak manan. Ita nia Governu kontinua dehan ami emprezáriu nasionál seidauk iha kapasidade. Ida ne'e mak problema boot ida ita nia Governu iha," hatete Prezidente Kámara Komérsiu Indústria Timor-Leste (CCI-TL) iha nia knaar fatin, Acait, Dili, Segunda (26/08/19).
Tuir loloos, Oscar dehan, Governu tenke iha polítika hodi bele fó oportunidade ba emprezáriu nasionál no internasionál servisu hamutuk, para emprezáriu nasionál bele hetan koñesimentu.
"Ho nune'e, kompañia internasionál bele fó sira nia papél, sira nia kbi'it, sira nia kapasidade. Ita mós bele na'ok husi ne'ebá para bele kapasita ita nia emprezáriu nasionál sira. Mas, to'o agora seidauk halo ida ne'e," Oscar afirma.
Prezidente CCI-TL ne'e mós husu atensaun ba Governu, atu bainhira halo lei tenke fó benefísiu ba emprezáriu nasionál sira. Nia dehan, susar bainhira halo lei la fó benefísiu ba emprezáriu nasionál sira.