Tuir informasaun ne'ebé www.tempotimor.com asesu iha ofisiál media PNDS, Sábado (17/12), reprezentante benefisiáriu, Florinda Maria sente kontetnte tebes ho politika oitavu Governu nian, ne’ebé konstrui um aba família kbi’it laek sira.
"Sente kontenti tebes, tanba iha tempu naruk nia laran ami senti mesak nu’udar feto faluk ho oan 1 ne'ebé sei eskola, agora dadaun hetan ona tulun husi Governu, ne’e hanesan asaun ida hakmaan ami nia todan", nia espresa.
Xefe Suku Fahisoi, Filomena Soares mós hato'o obrigado ba oitavu Governu Konstituisionál no Administrador Munisípiu Aileu, tanba fo ona konfiansa mai Postu Lequidoe hodi implementa UKL Plus A ho kuantidade uma 75.
"Ami promete sei serbisu makas no di’ak liu tán hodi bele implementa projeitu UKL Plus A ne'e ho tuir tempu nebe'e termina ona", dehan nia.
Nune'e, Administrador Municipio Aileu, Abel da Conçeição, hato'o parabens ba Postu Administrador Lequidoe, tanba hetan ona uma UKL Plus A ho kuantidade 75 hodi hari iha Suku 7 iha Postu Lequidoe.
"Agradese ba oitavo Governu konstituisional ne’ebé lidera husi Primeiru Ministru RDTL, Taur Matan Ruak ne'ebé ho polítika ida hakarak duni tau matan ba povo sira hodi hasai povo sira ne’ebé kb'iit laek hodi bele hetan uma fatin dignu", dehan nia.
Ekipa PNDS husu ba komunidade no autoridade Munisípiu Aileu atu nafatin kolabora serbisu entre Tekniku PNDS sira ne’ebé destaka iha Postu Administrativu atu bele serbisu di’ak tuir duni padraun ka matadalan PNDS nian
Tanba, Administrador Munisípiu Aileu hamutuk ho reprezentante PNDS Nasional, Administrador Postu Adminitrativo Lequidoe, Xefe Suku husi Suku hitu 7 iha Postu Lequidoe, Xefe Aldeia, halo ona lansamentu fatuk dahuluk ba projeitu UKL Plus A, ne'ebé hala’o iha Suku Fahisoi. (*)