Administradór Postu Administrativu Laulara, Alfrédo de Fátima iha inaugurasaun ne’e, husu ba sarani kristaun protestante atu kuidadu Igreja ne'ebé hari’i iha suku Fatisi nia laran.

“Tanba ne'e ha'u husu ba sarani assembleia de Deus, Sarani Protestante tenke kuida Kapela ida-ne'e atu nune'e nia furak ba bebeik bele sai di'ak liután sai hanesan Kapela ba Protestante sira iha Suku Fatisi”, dehan nia iha suku Fatisi, Postu Administrativu Laulara, Munisípiu Aileu, sábadu (27/08).

Nune'e husu ba Autoridade lokál sira hotu atu kontinua koordenasaun ne'ebé di'ak hodi labele hamosu dezentendimentu antre Igreja sira.

“Ha'u husu mós autoridade lokál iha Fatisi, Boklelo, Kapela ida-ne'e hari’i iha área Boklelo Fatisi e Tu'umeta e ha'u hakarak husu atu halo koordenasaun ba malu atu nune'e labele mosu buat balun ne'ebé mak ita la gosta ne'e mak ha'u husu”, afirma nia.

Koordenadór Rejiaun Tolu husi Igreja Evangélica Asembleia de Deus, Pastór Delfim Dias agradese, ba autoridade lokál sira tanba bele oferese fatin hodi halo konstrusaun Igreja nian.

“Uma ne'e remata ona molok atu uza halo dedikakasaun ba Maromak e ami bele konvida administradór no Autoridade na'in ulun autoridade iha fatin ne'e bele partisipa hamutuk ho ami”, dehan nia

Konstrusaun Igreja ne'e hetan apoiu husi Overses Mission Committee (OMC) husi Koreanu, ho osan montante rihun $8-resin. (*)