Hanoin ida ne'e fó sai husi Deputadu Banka FRETILIN Joaquim dos Santos bainhira ko'alia kona-ba asuntu turizmu iha edifisiu CNE.
Deputadu ne'e dehan, dezde uluk kedan maske Ministru ne'ebé tutela ba parte turizmu nian iha koñesimentu kona-ba turizmu nian, maibé inkompetente.
“Durante tinan 10 ne'e ba kotuk ministru sira inkompetente, ministru sira laiha kompeténsia. “Ministru sira koñesimentu iha, maibé atu halo lahatene halo," dehan deputadu Joaquim, Kinta (27/06).
Tuir nia, fatin potensial ba turizmu iha Timor Leste barak maibé ministru ne'ebé tutela mak la hatene defini politika turizmu nian.
“Sira hanoin de'it mak ida go international, ne'ebé osan tau iha ne'ebá ne'e só ba go international de'it."
Deputadu ne'e dehan, bainhira governu konsentra iha seitór turizmu bele kria kampu serbisu barak ba ema.
“Kuandu governu halo dezenvolvimentu seitór turizmu ne'e bele produz efeitu ekonomiku ne'e multiplikativu, mais ita-nia governu husi 2008 to'o mai 2016 abandona tiha realidade polítika ida ne'e, entaun ita lakon reseitas. Durante tinan 10 ne'e ita depende de'it ba mina rai."
Deputadu ne'e sujere mós atu governu dezenvolve didi'ak objetu turizmu relijiozu ne'ebé Indonezia husik hela.
“Ida uluk Indonezia husi hela ba ita hanesan Cristo Rei ne'e bele dezenvolve tiha sai hanesan mobilizasaun relijiozu, ema hotu-hotu bele mai vizita. Soibada Aitara bele halo mobilizasaun reliziozu ida par ema ba vizita, htama osan ba estadu, igreza. Ramelau mós mal organizadu, ema lao ba ho livre de'it, depois ba tiha Ramelau fila mai la husik osan oan ida."
“Eko-turizmu sira ne'ebé oras ne'e iha abandonadu hanesan, Com-Lospalos, Iliomar to'o Uatukarbau, Foho Mundu Perdidu-Ossú, Mota Bandeira-Ermera, ne'e mak dezenvolve ne'e osan tama ba kofre estadu," deputadu ne'e argumenta.
Ho nune'e, deputadu ne'e hatete, programa Miss Turizmu ne'ebé Eis Ministru Kalbuadi inisia nu'udar programa ne'ebé la tuir tempu.
"Timor Leste seidauk tempu par halo Miss Timor, tenke dezenvolve turizmu para kria kampu serbisu ba Timor-oan sira," nia afirma.
