Deputadu Bankada FRETILIN Joaquim dos Santos hatete, hanesan estadu ida, Timor Leste tenke moe, tanba la konsege kria kampu serbisu ba ninia ema sira, ikus mai barak mak sai ba serbisu iha rai li’ur.

“Ha’u uluk kedas la konkorda ita-nia ema, joven sira, ba serbisu iha rai li’ur, depois ba terus iha ema-nia rai hodi manan osan uitoan hodi sustenta sira-nia uma laran ho sira-nia familia. Hanesan estadu ne’e ita moe, tanba ita la konsege kria kampu serbisu ba ita-nia joven sira,” dehan deputadu ne’e iha edifisiu CNE, Kaikoli, Kinta (27/06).

Tuir Joaquim, maske trabaladór Timor-oan ne’ebé serbisu iha rai li’ur bele hatama reseita ba kofre estadu liu husi impostu, maibé politikamente la di’ak.

“Atu reduz ema ba rai li’ur, governu tenke kria kampu serbisu iha área agrikultura, iha peskas, turizmu no industria, edukasaun no fatin hotu-hotu, liu-liu liga ba profisaun téknika, profisaun profesionais.”

Liga ba profisaun professional, deputadu ne’e dehan, Sekretariu Estadu Formasaun Profesional no Empregu (SEFOPE) tenke serbisu maka’as liu tan.

“Maibé SEFOPE mak bilan, entaun tinan ba tinan ita-nia rai serbisu laiha, ema hakarak moris buka hahaan la hetan ba hotu li’ur.”

“Ba serbisu iha rai li’ur, ba fukit ema-nia manu fulun, loke ema-nia karau kulit, tesi ema-nia naan ruin, ku’u ema-nia hudi, sabraka, hamoos ema-nia karau luhan, fahi luhan, sira (ne’e) hotu serbisu par bele hetan buat ruma, mais, ita hanesan estadu di’ak liu kria kondisaun,” dehan deputadu ne’e.

Iha parte seluk jovens sira nafatin trata Pasaporte Portuges atu nune'e bele ba serbisu iha Inglatera ho Norte Irlanda.

"Se ha'u hela nafatin iha Timor maka ha'u sei la hetan nafatin servisu nune'e ha'u mai iha ne'e kada segunda feira hodi hare karik ha'u nia naran taka sai on a entaun ha'u sei hetan pasaporte portugal atu nune'e fasilita ha'u ba serbisu hodi hadi'a ha'u nia moris," dehan H. Freitas ba Tempo Timor iha besik embaixada portugal (24/06).

"Ha'u sei susar hetan serbisu se ha'u nafatin hela iha Timor Leste. Ha'u esforsu atu ba buka serbisu tan ba ha'u nia familia moris iha susar nia laran," dehan Freitas.