Tuir informasaun ne’ebé www.tempotimor.com asesu iha pájina MTKI, kuarta (29/06) katak, Vise-Ministra Turizmu Komunitária Kulturál, Inácia da Conceição Teixeira, ne’ebé partisipa iha serimónia anúnsiu manán na’in vensedór na’in-rua feto no mane ida iha kompetisaun diskursu públiku sai Embasadór Turizmu ba ema hotu 2022-2023 ho nia tema “Uniaun iha diversidade atu promove turizmu relijiozu iha hau nia Timor-Leste”.
Ba programa kompetisaun ne’e organiza husi USAID Tourism for All Project, serbisu hamutuk ho Asosiasaun Turizmu Relijiozu Timor-Leste (ATR-TL) no hetan apoiu husi Servisu Sosiedade Civíl Auditoria Sosiál (SASCAS) Gabinete Primeiru Ministru no parseiru diak ho Ministériu Turismu Komérsiu no Indústria (MTKI) ne’ebé realiza tiha ona programa diskursu iha loron-17 Maiu 2022, konkorente ne’ebé tuir kompetisaun diskursu hamutuk na’in-10 husi Univerdade UNTL, UNITAL, UNDIL, IOB, DIT.
Haree ba objetivu prinsipál husi kompetisaun ne’e atu hasa’e foinsa’e sira-nia konsiénsia kona-ba polítika nasionál turizmu Timor-Leste nian no enkoraja sira atu sai sidadaun ne’ebé ativu hodi ajuda promove turizmu iha Timor-Leste.
Iha selebrasaun anúnsiu rezultadu ne’e Vise-Ministra Turizmu Komunitária, Inácia agradese tebes ba ATR-TL no Tourism for All Project ne’ebé realiza programa ida-ne’e hodi promove juventude sira-nia talentu kreatividade implementasaun no kapasitasaun iha área turizmu.
“Tenke dezenvolve turizmu Komunitária, Turizmu Rezisténsia no turizmu sira seluk, espera katak liuhusi kooperasaun USAID, ATR-TL, liña ministeriál no ajénsia internasionál bele serbisu hamutuk ho hanoin ida hodi dezenvolve di’ak liután sitíu turístiku iha rai-Laran”, dehan Inacia.
Tanba hahú husi tinan-2020, MTKI identifika ona sítiu turístika hamutuk 35 ne’ebé maka ho nia temátiku lahanesan iha ne’ebé komunidade bele jere hanesan Agro-turizmu, ortikultura, relijiozu, turizmu komunitária, turizmu rezisténsia, turizmu kafé Mambae (manbae kofi trail) no turizmu sira seluk, husi fatin hirak balun implementa ona no iha balu kontinua iha prosesu.
“Bainhira fatin sira ne’e dezenvolvidu ona infraestrutura bázika, ita prepara ita-nia povu oinsá simu bainaka ho di’ak nomós ba treinamentu kapasitasaun gastronomia.
Tanba ne’e, programa hirak ne’e Governu labele halo mesak, presiza halo parseria ho parseiru dezenvolvimentu sira nomós sosiedade sívil.
Prezidente ATR-TL, Padre Ângelo Salsinha hatete, eventu ida-ne’e importante tebes nune’e ajénsia sira serbisu hamutuk di’ak liután.
“Mai ita la’o hamutuk hodi turizmu ba ema hothotu liliu sosiedade sivil, Ministériu Túrizmu no komponente sira seluk, mai ita hamutuk atu hanorin Timoroan ida-idak sai embasadór ba nia nasaun rasik.
Tanba ne’e mak ema hothotu hanesan na’in hira ne’ebé mak ko’alia kona-ba Timor nia beleza, rikusoin, tasi, beleza naturál, istória, relijiaun, kultura no identidade.
“Sé ita hothotu sai ambassadór ba buat hirak ne’e Timor sei sai oin seluk”, dehan Padre Ângelo.
Ba Embaisadór na’in rua ne’e importante hodi servisu hamutuk ho Asossiasaun ATR-TL no USIAD Tourism for All Project, hodi foku ba prioridade no prosperiedade turizmu iha Timor-Leste.
Embasadór na’in rua kompromete katak sei servisu hamutuk ho Asosiasaun ATR-TL no USAID Tourism for All Project no governu hodi hala’o promosaun sítiu turístiku sira.
Partisipa iha eventu ne’e mak Pontu-fokál Expo Mundiál Dubai, Manuel Vong no reprezentante konfisoens relijioza, Sosiedade Sivíl Auditária Sosiál (SASCAS), reprezentante Gabinete Primeiru Ministru. (*)
